ស្ពានមិត្តភាពកម្ពុជា-ចិន មេគង្គខេត្តក្រចេះ បច្ចុប្បន្នត្រូវបានក្រុមការងារបច្ចេកទេសសាងសង់តម្លើងបង្គោលអំពូលភ្លើងនៅសងខាងលើបង្កាន់ដៃស្ពានរួចរាល់ជាស្ថាពរ ខណៈដែលកំណាត់ផ្លូវ ៦០B តភ្ជាប់ពីរង្វង់មូលខ្លាស្ទុះទៅកាន់គល់ស្ពានឆ្លងកាត់ទន្លេមេគង្គក្រចេះនៅត្រើយខាងកើត និងពីគល់ស្ពានត្រើយខាងលិចចម្ងាយប្រមាណជា ៥ គីឡូម៉ែត្រ បាននឹងកំពុងចាក់ក្រាលថ្មម៉ិចដើម្បីត្រៀមអ៊ុតកៅស៊ូដូចគ្នាផងដែរ។ អំពូលភ្លើងទាំងអស់សរុបប្រមាណជាង ១១៦ដើម ជាប្រភេទអំពូល LED ប្រើប្រាស់អគ្គិសនី ដាក់ពង្រាយលើបង្កាន់ដៃស្ពានទាំងសង់ខាងចន្លោះពីមួយទៅមួយប្រមាណជាង ២០ម៉ែត្រពីគ្នាមើលទៅឃើញថាស្អាតខ្លាំងណាស់។ រីឯបាតស្ពានក៌នៅពុំទាន់រួចរាល់ទាំងស្រុងនោះដែរ ដោយរងចាំការចាក់អ៊ុតកៅស៊ូពីលើបន្ថែមទៀត ប៉ុន្តែទោះជាយ៉ាងណាពលរដ្ឋដែលចង់ធ្វើដំណើរដោយម៉ូតូ និងរថយន្តធុនតូច អាចជិៈឆ្លងកាត់បានអាស្រ័យទៅលើអ្នកយាមប្រចាំការនៅទីនោះ។ ជាមួយគ្នានោះ កំណាត់ផ្លូវ ៦០B តភ្ជាប់ពីរង្វង់មូលខ្លាស្ទុះឆ្ពោះទៅគល់ស្ពានមេគង្គឆ្លងកាត់ទន្លេ ដែលជាផ្លូវបង្កើតថ្មី និងជាផ្លូវក្រវ៉ាតក្រុងដ៏សំខាន់មួយខ្សែររបស់ខេត្ត ត្រូវបានក្រុមវិស្វកម្មកំពុងមមាញឹកក្នុងការចាប់ផ្ដើមចាក់ក្រាលថ្មម៉ិចដើម្បីត្រៀមអ៊ុតកៅស៊ូឈានទៅបញ្ចប់ជាស្ថាព័រ។ ដោយឡែក កំណាក់ផ្លូវលេខ ៦០B នៅត្រើយខាងលិចឯណោះវិញ ក៏បានចាក់ក្រាលកៅស៊ូម្តងរួចមកហើយ និងត្រៀមចាក់កៅស៊ូម្តងទៀតជាការស្រេចផងដែរ៕