លោក ច្រឹក សុខនីម អគ្គនាយកក្រុមហ៊ុន Century21 Mekong មានប្រសាសន៍ថា គម្រោងសាងសង់ស្ពានតភ្ជាប់ពីកោះនរា ទៅអរិយក្សត្រគឺជាការ បើកច្រកថ្មីមួយទៀតសម្រាប់ការធ្វើដំណើររបស់ប្រជាពលរដ្ឋ ដែលនឹងផ្ដល់ឱកាសច្រើននៅពេលអនាគត។ លោកបានបញ្ជាក់ថា៖ «ប្រសិនបើការសាងសង់ហើយ ហើយឱ្យតម្លៃផ្ទះ ឬដីនៅតំបន់អរិយក្សត្រកើនឡើងនោះ ខ្ញុំគិតថា មិនទាន់ទេ ដោយសារស្ថានភាពសេដ្ឋកិច្ចសាកលកំពុងជួបបញ្ហាលំបាក គ្រាន់តែជួយសម្រួល និងឱកាសក្នុងពេលអនាគត»។ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី ២៨ ខែមករា ឆ្នាំ ២០២៦ បានដឹកនាំកិច្ចប្រជុំពិនិត្យ និងពិភាក្សាលើគម្រោងសិក្សា និងសាងសង់ស្ពានឆ្លងកាត់ទន្លេមេគង្គ តភ្ជាប់ពីកោះនរា ទៅក្រុងរណបមេគង្គឃី នៃក្រុងអរិយក្សត្រ ដែលមានការចូលរួមតំណាងក្រុមហ៊ុន OCIC និងភាគីពាក់ព័ន្ធ។ ក្រសួងសារធារណការ និងដឹកជញ្ជូន មិនទាន់បញ្ជាក់ពីទំហំនៃការចំណាយ និងពេលវេលាចាប់ផ្ដើមបើកការដ្ឋានសាងសង់ស្ពាននេះនៅឡើយទេ។ កាលពីថ្ងៃទី ១៧ ខែធ្នូ ឆ្នាំ ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឱ្យវិស័យឯកជនសិក្សា សាងសង់ស្ពាន តភ្ជាប់ពីកោះនរា ទៅអរិយក្សត្រ បន្ថែមទៀត ដើម្បីបើកច្រកសម្រាប់ការធ្វើដំណើររបស់ប្រជាពលរដ្ឋ។ សោភ័ណភាពទន្លេចតុមុខ គឺនៅខាងក្រោម ប៉ុន្តែត្រូវគិតអំពីចរាចរណ៍ ខណៈនឹងមានផ្លូវបន្ថែមទៀតនៅពេលខាងមុខ ហើយសម្ដេចធិបតីសង្ឃឹមថា សក្ដានុពលនៃការតភ្ជាប់នេះ នឹងនាំការរីកចម្រើននៅខាងកើតទន្លេ មិនមែនតែនៅក្រុងអរិយក្សត្រ គឺតំបន់ខាងកើតតែម្ដង ដែលអាចហៅបានថាទីក្រុងខាងកើតទន្លេ៕