កិច្ចប្រជុំពិនិត្យវឌ្ឍនភាពការងាររៀបចំសេចក្តីព្រាងរបាយការណ៍វាយតម្លៃសមិទ្ធកម្មផែនការសកម្មភាពអាទិភាពប្រចាំឆ្នាំ២០២៥ និងផែនការសកម្មភាពអាទិភាពឆ្នាំ២០២៦ របស់អង្គភាពជំនាញក្រោមឱវាទក្រសួង ទីស្តីការក្រសួង៖ នាថ្ងៃពុធ ទី២៨ ខែមករា ឆ្នាំ២០២៦ ឯកឧត្តម សុន សុខកេង អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាអនុប្រធានប្រចាំការក្រុមការងារតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រ ផែនការអភិវឌ្ឍន៍ និងគោលនយោបាយរបស់ក្រសួងសាធារណការ និងដឹកជញ្ជូន(ក.យ.ផ.គ.សកដ.) បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងាររៀបចំសេចក្តីព្រាងរបាយការណ៍វាយតម្លៃសមិទ្ធកម្មផែនការសកម្មភាពអាទិភាពប្រចាំឆ្នាំ២០២៥(PAP-2025) និងផែនការសកម្មភាពអាទិភាពឆ្នាំ២០២៦(PAP-2026) របស់អង្គភាពជំនាញក្រោមឱវាទក្រសួង ដោយមានការអញ្ជើញចូលរួមពី ឯកឧត្តម លោក លោកស្រី ដែលជាសមាជិក ក.យ.ផ.គ.សកដ. និងតំណាងអង្គភាពថ្នាក់ជាតិក្រោមឱវាទក្រសួង ចំនួន១៤អង្គភាព សរុបប្រមាណ ៨០រូប។ កិច្ចប្រជុំនេះរៀបចំឡើងដើម្បីធ្វើការពិនិត្យពិភាក្សាលើសេចក្តីព្រាងទាំង២ខាងលើ រួមទាំងបញ្ហាប្រឈមនានា សំណូមពរ ការប្រមូលធាតុចូលបន្ថែមឱ្យបានគ្រប់ជ្រុងជ្រោយ និងការដាក់ចេញទិសដៅបន្ត ឱ្យស្របតាមយុទ្ធសាស្ត្របញ្ចកោណដំណាក់កាលទី១ ផែនការយុទ្ធសាស្ត្រអភិវឌ្ឍន៍ជាតិ និងគោលនយោបាយនានាក្នុងវិស័យសាធារណការនិងដឹកជញ្ជូន។ ដោយគោរពតាមគោលការណ៍ណែនាំដ៏ខ្ពង់ខ្ពស់របស់ឯកឧត្តមរដ្ឋមន្ត្រី និងលោកជំទាវរដ្ឋលេខាធិការប្រចាំការ និងជាប្រធានក្រុមការងារ ក.យ.ផ.គ.សកដ. បានដាក់ចេញនូវគោលការណ៍ណែនាំក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន ដើម្បីឱ្យគ្រប់អង្គភាពអនុវត្ត ឱ្យមានប្រសិទ្ធភាព សង្គតិភាព និងជោគជ័យទាន់ពេលវេលាតាមផែនការគ្រោងទុក៕