រដ្ឋមន្រ្តីមកពីក្រសួងចំនួន២ បានប្រារពពិធីប្រកាសដាក់ឱ្យអនុវត្តសាកល្បង លើការកែលម្អរថយន្តដឹកជញ្ជូនកម្មករ និយោជិតឱ្យកាន់តែមានផាសុកភាព និងសុវត្ថិភាព និងត្រួតពិនិត្យលក្ខណៈបច្ចេកទេសរថយន្តដឹកជញ្ជូនកម្មករនិយោជិត។ពិធីនេះធ្វើឡើងក្រោមអធិបតីភាពពីលោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងលោកហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។អភិបាលខេត្តកំពង់ឆ្នាំង លោកស៊ុន សុវណ្ណារិទ្ធិ និងលោកស្រី ស៊ាវយៀន ឈាន (Xiaoyan Qian) នាយិកាការិយាល័យប្រចាំប្រទេសថៃ កម្ពុជា និងឡាវ នៃអង្គការអន្តរជាតិខាងការងារ (ILO) តំណាងក្រសួងស្ថាប័ន តំណាងនិយោជិក អ្នកបើកបររថយន្តដឹកជញ្ជូនកម្មករនិយោជិត និងបងប្អូនកម្មករនិយោជិតជាច្រើនរូបទៀតក៏បានចូលរួមផងដែរ។ ពិធីនាថ្ងៃនេះ ធ្វើឡើងក្នុងគោលបំណងផ្សព្វផ្សាយ និងជំរុញឱ្យមានការផ្លាស់ប្តូរពីរថយន្ត ប្រភេទដឹកទំនិញដោយកែច្នៃ កែលម្អឱ្យមានកៅអីអង្គុយសមរម្យ សម្រាប់ដឹកជញ្ជូនបងប្អូនកម្មករ និយោជិត ស្របតាមផែនការជាអាទិភាពរបស់រាជរដ្ឋាភិបាល ដែលបានចង្អុលបង្ហាញឱ្យក្រសួងស្ថាប័នពាក់ព័ន្ធរិះរកយន្តការគាំទ្រ និងការលើកទឹកចិត្តនានា សំដៅធ្វើយ៉ាងណា ឱ្យរថយន្តសម្រាប់ដឹកជញ្ជូនបងប្អូន កម្មករនិយោជិតមានផាសុកភាពជាងមុន ត្រឹមឆ្នាំ២០២៧ ជាពិសេសការសម្របសម្រួលរៀបចំឱ្យរថយន្តដឹកជញ្ជូនកម្មករ និយោជិតទទួលបានការត្រួតពិនិត្យលក្ខណៈបច្ចេកទេស ដែលនេះជាការចូលរួមលើកកម្ពស់ផាសុកភាព សុវត្ថិភាព និងសណ្តាប់ធ្នាប់សាធារណៈ ឱ្យកាន់តែប្រសើរជាងមុន ជូនដល់កម្មករនិយោជិត៕