កិច្ចប្រជុំពិភាក្សា ដើម្បីឈ្វេងយល់បន្ថែមពីឱកាសវិនិយោគក្នុងវិស័យដឹកជញ្ជូនផ្លូវទឹកនៅកម្ពុជា ទីស្តីការក្រសួង៖ នាថ្ងៃចន្ទ ទី២០ ខែមករា ឆ្នាំ២០២៦ ឯកឧត្តម ហេង សុធី អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ទទួលជួបពិភាក្សាការងារជាមួយលោកស្រី Blake Dawgert ប្រធានផ្នែកពាណិជ្ជកម្ម និងសេដ្ឋកិច្ច នៃស្ថានទូតសហរដ្ឋអាមេរិកប្រចាំនៅកម្ពុជា ដោយមានការចូលរួមពីលោកអគ្គនាយករង លោកប្រធាននាយកដ្ឋាន និងមន្ត្រីជំនាញពាក់ព័ន្ធ។ កិច្ចពិភាក្សានេះត្រូវបានរៀបចំឡើងក្នុងគោលបំណងផ្លាស់ប្តូរយោបល់ និងឈ្វេងយល់បន្ថែមពីឱកាសវិនិយោគក្នុងវិស័យដឹកជញ្ជូនផ្លូវទឹក ផ្លូវសមុទ្រ និងកំពង់ផែរបស់ព្រះរាជាណាចក្រកម្ពុជា ដោយបានបង្ហាញពីគម្រោងអភិវឌ្ឍន៍អាទិភាពសំខាន់ៗ ដែលមានក្នុងផែនការយុទ្ធសាស្ត្រ ១០ឆ្នាំ ស្តីពីការដឹកជញ្ជូនផ្លូវទឹក ផ្លូវសមុទ្រ និងកំពង់ផែ (២០២៦-២០៣៥) រួមមានជាអាទិ៍៖ ឧស្សាហកម្មផលិតនាវា ការចុះបញ្ជីនាវានិងការត្រួតពិនិត្យលក្ខណបច្ចេកទេសនាវា ការអភិវឌ្ឍប្រព័ន្ធគ្រប់គ្រងចលនានាវាចរណ៍ និងការពង្រឹងសន្តិសុខ សុវត្ថិភាព និងបរិស្ថានក្នុងវិស័យដឹកជញ្ជូនផ្លូវទឹក ផ្លូវសមុទ្រ និងកំពង់ផែ។ ឆ្លៀតក្នុងឱកាសនោះ ឯកឧត្តមអគ្គនាយក បានគូសបញ្ជាក់បន្ថែមពីបរិយាកាសអំណោយផលនៃវិស័យដឹកជញ្ជូនផ្លូវទឹក ផ្លូវសមុទ្រ និងកំពង់ផែរបស់កម្ពុជាសម្រាប់បើកឱកាសចូលរួមវិនិយោគពីបរទេស តាមរយៈសំទុះកំណើនសេដ្ឋកិច្ច ក្របខណ្ឌគតិយុត្ត និងបានបង្ហាញនូវការគាំទ្រយ៉ាងកក់ក្តៅចំពោះការពង្រឹងកិច្ចសហប្រតិបត្តិការល្អប្រសើរលើវិស័យដឹកជញ្ជូនផ្លូវទឹក ផ្លូវសមុទ្រ និងកំពង់ផែ ជាពិសេសតាមរយៈការទាក់ទាញអ្នកវិនិយោគិនអាមេរិកមកកាន់កម្ពុជាឱ្យបានច្រើនបន្ថែមទៀតនាពេលខាងមុខ៕