និស្សិតជ័យលាភីអាហារូបករណ៍រដ្ឋាភិបាលប្រទេសនូវែលសេឡង់ ឆ្នាំ២០២៦ ទទួលអនុសាសន៍ផ្តាំផ្ញើល្អៗ មុនចេញដំណើរទៅបន្តការសិក្សា ទីស្តីការក្រសួង៖ នាថ្ងៃចន្ទ ទី១២ ខែមករា ឆ្នាំ២០២៥ ឯកឧត្តម ឈួន វិន រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាលជាមួយក្រុមនិសិ្សតជ័យលាភីអាហារូបករណ៍រដ្ឋាភិបាលប្រទេសអូស្ត្រាលី សម្រាប់ឆ្នាំ២០២៦ មុនចេញដំណើរទៅសិក្សា ដោយមានការចូលរួមពីសំណាក់ថ្នាក់ដឹកនាំក្រសួង និងមន្ត្រីពាក់ព័ន្ធផងដែរ។ ជំនួបនេះ រៀបចំឡើង ដើម្បីចែករំលែកអំពីបទពិសោធន៍ អនុសាសន៍ និងការណៃនាំល្អៗ ដែលជាទស្សនទានដ៏មានតម្លៃបំផុតសម្រាប់និស្សិតយកទៅសិក្សាស្វែងយល់ និងជួយផ្សព្វផ្សាយពីវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានយល់ដឹងកាន់តែច្បាស់អំពីប្រទេសកម្ពុជាថែមទៀត។ បន្ថែមពីលើនេះឯកឧត្តម ក៏បានលើកឡើងអំពីសមិទ្ធផលសំខាន់ៗ និងការងារជាច្រើនដែលក្រសួងបាន និងកំពុងអនុវត្តក្នុងនាមជាសេនាធិការរបស់រាជរដ្ឋាភិបាល កំពុងអនុវត្តលើវិស័យសាធារណការ និងដឹកជញ្ជូន នៅកម្ពុជាឱ្យកាន់តែមានការអភិវឌ្ឍកាន់តែប្រសើរឡើង។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានចូលរួមអបអរសាទរ កោតសរសើរចំពោះនិស្សិតជ័យលាភីទាំងអស់ និងបានពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ក៏ដូចជាជំរុញលើកទឹកចិត្តឱ្យនិស្សិតទាំងអស់យកចិត្តទុកដាក់ និងខិតខំប្រឹងប្រែងសិក្សារៀនសូត្រទាំងនៅក្នុងសាលា និងស្វែងយល់ចំណេះដឹងថ្មីៗបន្ថែមពីមជ្ឈដ្ឋានខាងក្រៅ និងពង្រឹងសមត្ថភាពរបស់ខ្លួន ដើម្បីទទួលបាននូវលទ្ធផលដ៏ល្អប្រសើរ និងចូលរួមក្នុងការអភិវឌ្ឍកសាងសង្គម-សេដ្ឋកិច្ចកម្ពុជា ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលអាណ្តិតទី៧ និងសក្តានុពលជំនាញរៀងៗខ្លួនជាមួយរាជរដ្ឋាភិបាលនៅពេលវិលត្រឡប់មកមាតុប្រទេសវិញ ។ សូមជម្រាបដែរថា៖ និស្សិតអាហារូបករណ៍ដែលនឹងត្រូវបន្ដការសិក្សានៅប្រទេសនូវែលសេឡង់ សម្រាប់ឆ្នាំ២០២៦នេះ មានចំនួនសរុប ៣០នាក់ ស្រី១៦នាក់ មានថ្នាក់អនុបណ្ឌិត២៦រូប និងថ្នាក់បណ្ឌិត៤រូប ក្នុងនោះមានមន្ត្រីរាជការមកពី ក្រសួង-ស្ថាប័នឯកជន ដែលនឹងត្រូវសិក្សាលើមុខជំនាញ រួមមាន៖ បច្ចេកវិទ្យាអាហារ គោលនយោបាយបរិស្ថាន និងការគ្រប់គ្រង គ្រប់គ្រងកសិធុរកិច្ច វិទ្យាសាស្ត្រដី ធុរកិច្ច និងសេដ្ឋកិច្ច ភាសាអង់គ្លេស គ្រប់គ្រងគ្រោះមហន្តរាយ គោលនយោបាយសាធារណៈ ការប្រែប្រួលអាកាសធាតុ និងគោលនយោបាយជាដើម៕