ផ្លូវមួយខ្សែ ដែលរងការខូចខាតស្ទើរទាំងស្រុង ស្ថិតនៅសង្កាត់ជ្រាវ ក្រុងសៀមរាប ត្រូវបានចាប់ផ្ដើមជួសជុលឡើងវិញ ដោយសាងសង់ជាផ្លូវកៅស៊ូ ដើម្បីជួយសម្រួលដល់ការធ្វើចរាចរណ៍របស់ប្រជាពលរដ្ឋ និងការដឹកជញ្ជូនទេសចរ ដែលផ្លូវនេះត្រូវបានចាត់ទុកថាមានសារៈសំខាន់បំផុតសម្រាប់មូលដ្ឋាន។ លោក គង់ ប៊ឹប អ្នកជួយមើលការខុសត្រូវការជួសជុល បានឱ្យដឹងថា កន្លងមកផ្លូវមួយខ្សែនេះមានការលំបាកខ្លាំងពេលធ្វើដំណើរ ហើយអាជ្ញាធរធ្លាប់បានរៀបចំជួសជុលម្ដងហើយ ប៉ុន្តែដោយសាររដូវភ្លៀងខ្លាំងមិនអាចអនុវត្តបាន ទើបបានចាប់ផ្ដើមជួសជុលនាពេលបច្ចុប្បន្ននេះ។ លោក បានឱ្យដឹងថា ការជួសជុលផ្លូវចាក់កៅស៊ូនេះ មានការចូលរួមគាំទ្រថវិកាពី ឯកឧត្តមអ្នកឧកញ៉ា សៀង ណាំ អ្នកតំណាងរាស្ត្រខេត្តសៀមរាប ឯកឧត្តម ប្រាក់ សោភ័ណ អភិបាលខេត្ត ។ ផ្លូវមួយខ្សែនេះ តភ្ជាប់ពី វិថីសម្ដេចជា ស៊ីម ឆ្ពោះទៅកាន់ ផ្លូវក្រវាត់ក្រុងទី២ និងទី៣ នៃសង្កាត់ជ្រាវ ក្រុងសៀមរាប៕