កំណាត់ផ្លូវជាតិលេខ ៧៨C ប្រវែង២៨០០ម៉ែត្រ ទទឹង ៧ម៉ែត្រ ត្រូវបានមន្ទីរសាធារណការនិងដឹកជញ្ជូនខេត្តរតនគិរី បើកការដ្ឋានជួសជុលលើកកម្រិតគុណភាពទៅជាផ្លូវប្រភេទគ្រឹះថ្មម៉ិច និងក្រាលកៅស៊ូពីរជាន់ (DBST) នៅថ្ងៃទី ៣ ខែធ្នូនេះ ដើម្បីបម្រើឱ្យផលប្រយោជន៍សាធារណៈ ជាពិសេសពលរដ្ឋក្នុងមូលដ្ឋានចំនួន២ស្រុក ដែលធ្វើដំណើរជាប្រចាំ។ ផ្លូវជាតិលេខ ៧៨C នេះ ពិតជាបម្រើផលប្រយោជន៍ ដល់ស្រុកអូរជុំ និងស្រុកវើនសៃ រួមមានប្រជាជន ក្នុងឃុំកាឡៃ និងឃុំអូរជុំ ដែលតភ្ជាប់ពីស្រុកអូរជុំ ស្រុកវើនសៃ ទៅកាន់ស្រុកសៀមប៉ាង ខេត្តស្ទឹងត្រែង និងពីស្រុកវើនសៃ ស្រុកអូរជុំ មកកាន់ផ្លូវជាតិលេខ ៧៨ ទីរួមខេត្តរតនគិរី។នាឱកាសអញ្ជើញចូលរួមពិធីបើកការដ្ឋាននេះ អភិបាលខេត្តរតនគិរី លោក ញ៉ែម សំអឿន មានប្រសាសន៍ថា ផ្លូវជាតិលេខ ៧៨C (អូរជុំ-វើនសៃ) ជាផ្លូវសេដ្ឋកិច្ចមួយដ៏សំខាន់ដើម្បីបម្រើឱ្យផលប្រយោជន៍ប្រជាពលរដ្ឋក្នុងស្រុកទាំង២ ក្នុងការដឹកកសិផលផ្សេងៗ ដែលប្រមូលផលបាន ទៅកាន់ទីផ្សារ ក៏ដូចជាការងាយស្រួលក្នុងការដឹកសម្ភារឧបភោគបរិភោក និងសម្ភារសំណង់ ដែលផ្គត់ផ្គង់ដល់ជីវភាពរស់នៅ ប្រចាំថ្ងៃរបស់ប្រជាពលរដ្ឋ។ដើម្បីដំណើការជួសជុល ផ្លូវនេះអោយទទួលបានជោគជ័យ លោក ញ៉ែម សំអឿន បានស្នើដល់បងប្អូនប្រជាពលរដ្ឋទាំងអស់ មេត្តាជួយ សហការ កុំដឹកជញ្ជូនសំពីងសំពោង និងដឹកគ្រួស ថ្ម ខ្សាច់ ដោយធ្វើការវិចខ្ចប់ឱ្យបានត្រឹមត្រូវ ។ លោកសង្កត់ធ្ងន់ថា៖«ពិសេសអាជ្ញាធរដែនដី នៃ ស្រុកទាំង២ មេត្តាផ្សព្វផ្សាយអោយបានទូលំទូលាយ ដល់ប្រជាពលរដ្ឋរបស់ខ្លួនដែលរស់នៅ តាមបណ្តោយផ្លូវ សូមចូលរួម សហការសម្របសម្រួលរាល់បញ្ហា ដែលប៉ះពាល់ដល់ផលប្រយោជន៍របស់បងប្អូនប្រជាពលរដ្ឋ» ។បើតាម លោក សាយ សាមាន ប្រធានមន្ទីរសាធារណការ និងដឹកជញ្ជូនខេត្តរតនគិរី គម្រោងជួសជុលផ្លូវជាតិលេខ ៧៨C ប្រវែង ២៨០០ម និង ទទឹង៧ម ពី PK 125+900 ដល់ PK 128+700 ជាប្រភេទគ្រឹះថ្មម៉ិច និងក្រាលកៅស៊ូពីរជាន់ (DBST) មានពីរគន្លងដោយប្រើប្រាស់កញ្ចប់ថវិកាជាតិ តាមរយៈក្រសួងសាធារណការនិងដឹកជញ្ជូន និង ក្រសួងសេដ្ឋកិច្ចនិងហិរញ្ញវត្ថុ ជួសជុលដោយមន្ទីរសាធារណការ និងដឹកជញ្ជូនខេត្តរតនគិរី តាមកិច្ចសន្យាដែលបានកំណត់ក្នុងគម្រោង សម្រាប់ឆ្នាំ២០២៦៕