កិច្ចប្រជុំរដ្ឋមន្រ្តីដឹកជញ្ជូនអាស៊ានជាមួយដៃគូសន្ទនា ដែលរួមមាន ប្រទេសចិន ប្រទេសជប៉ុន និង សាធារណរដ្ឋកូរ៉េ បានប្រព្រឹត្តទៅដោយជោគជ័យ ទីក្រុងណៃពិដោ ៖ នារសៀលថ្ងៃទី២០ ខែវិច្ឆិកា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូកម្ពុជាអញ្ជើញចូលរួមកិច្ចប្រជុំរដ្ឋមន្រ្តីដឹកជញ្ជូន អាស៊ាន-ចិន លើកទី២៤, កិច្ចប្រជុំរដ្ឋមន្រ្តីដឹកជញ្ជូន អាស៊ាន-ជប៉ុន លើកទី២៣ និង កិច្ចប្រជុំរដ្ឋមន្រ្តីដឹកជញ្ជូន អាស៊ាន-កូរ៉េ លើកទី១៦។ ក្នុងកិច្ចប្រជុំជាមួយដៃគូសន្ទនានីមួយៗ ឯកឧត្តម ប៉េង ពោធិ៍នា បានធ្វើបទអន្តរាគមន៍ដោយបានថ្លែងអំណរគុណដល់ដៃគូសន្ទនាទាំងបីដែលបានគាំទ្រយ៉ាងសកម្មដល់ការអភិវឌ្ឍលើវិស័យដឹកជញ្ជូន និងឡូជីស្ទីក ទាំងក្នុងក្របខណ្ឌអាស៊ាន និងក្នុងក្របខណ្ឌទ្វេភាគី។ ឯកឧត្តមរដ្ឋមន្រ្តីបានសំដែងនូវការគាំទ្រ និងអនុម័តផែនការសកម្មភាពដែលត្រូវបន្តអនុវត្តក្រោយឆ្នាំ២០២៥ ក៏ដូចជាបានបញ្ជាក់ពីការប្តេជ្ញាចិត្តរបស់កម្ពុជាក្នុងការបន្តសហការយ៉ាងជិតស្និទ្ធជាមួយអាស៊ាន និងដៃគូសន្ទនា ដើម្បីលើកកម្ពស់ កិច្ចសហប្រតិបត្តិការដឹកជញ្ជូនដែលមានលក្ខណៈជាក់ស្តែង ទស្សនវិស័យអនាគត និងផ្តល់ផលប្រយោជន៍ដល់ប្រជាជន។ សូមជម្រាបថា រដ្ឋមន្រ្តីដឹកជញ្ជូនអាស៊ាន បានអនុម័តនូវឯកសារសំខាន់ចំនួន ៣ ជាមួយដៃគូសន្ទនា ចិន ជប៉ុន និងកូរ៉េ រួមមាន៖ ផែនការយុទ្ធសាស្ត្រសម្រាប់កិច្ចសហប្រតិបត្តិការដឹកជញ្ជូនអាស៊ាន-ចិន ឆ្នាំ២០២៦-២០៣៥, ផែនការការងារភាពជាដៃគូដឹកជញ្ជូនអាស៊ាន-ជប៉ុន ឆ្នាំ២០២៥-២០២៦ និងផែនទីបង្ហាញផ្លូវនៃកិច្ចសហប្រតិបត្តិការដឹកជញ្ជូនអាស៊ាន-កូរ៉េ ឆ្នាំ២០២៦-២០៣០។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube