កំណាត់ខ្សែផ្លូវលំ និងកៅស៊ូ សរុបប្រវែង ៨៤.២០០ ម៉ែត្រ ស្ថិតក្នុងស្រុកក្រុងចំនួន ៥ គឺ ៖-ស្រុកឆ្លូង-ក្រុងក្រចេះ-ព្រែកប្រសព្វ-ចិត្របុរី និងស្រុកសំបូរ ក្នុងនោះផ្លូវក្រាលកៅស៊ូ DBST ចំនួន ៣ខ្សែ ប្រវែងសរុប ២១.២០០ម៉ែត្រ ទទឹងខ្នងលើ៥ម និងផ្លូវក្រាលល្បាយគ្រួស ល្បាយគ្រួសធម្មជាតិចំនួន ៣ខ្សែ ប្រវែងសរុប ៦៣.០០០ ម៉ែត្រ ទទឹងខ្នងលើ ៥ម-៦ម និង៧ម ដែលជាគម្រោងថែទាំប្រចាំរបស់មន្ទីរអភិវឌ្ឍន៍ជនបទខេត្តសម្រាប់ឆ្នាំ២០២៥ ពេលនេះត្រូវបានត្រួតពិនិត្យ វាយតម្លៃការប្រគល់-ទទួល ពីគណៈកម្មាការអន្តរក្រសួង មុននឹងប្រគល់ជូនសម្រាប់ប្រជាពលរដ្ឋនៅមូលដ្ឋាន បានធ្វើដំណើរប្រកបដោយការជឿជាក់ និងការទទួលខុសត្រូវ ។ ថ្លែងក្នុងឱកាសនោះឯកឧត្តម ផូ ផារិទ្ធ រដ្ឋលេខាធិការនៃក្រសួងអភិវឌ្ឍន៍ជន បានគូសបញ្ជាក់ថា ការងារថែទាំប្រចាំនេះ បានជួយសម្រួលដល់ប្រជាពលរដ្ឋធ្វើចរាចរទៅមក ដឹកជញ្ជូនផលិតផលកសិកម្ម និងកសិឧស្សាហកម្ម ពិសេសការធ្វើដំណើររបស់សិស្សានុសិស្សទៅសាលារៀន ការដឹកអ្នកជំងឺមកទទួលសេវាសុខាភិបាលនានា បានទាន់ពេលវេលា ឆ្លើយតបទៅនឹងគោលនយោបាយរបស់រាជរដ្ឋាភិបាល ដែលមានក្រសួងអភិវឌ្ឍន៍ជនបទ ជាសេនាធិការ ៕