ភ្នំពេញ ៖ បន្ទាប់ពី អាងហែលទឹក នៅក្នុងពហុកីឡដ្ឋានជាតិអូឡាំពិក មានសភាពចាស់ទ្រុឌទ្រោម ដែលតម្រូវឲ្យមានការជួសជុល ឡើងវិញនោះ លោក ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ ការជួសជុលអាងហែលទឹក នេះនឹងត្រូវចំណាយ ថវិកាប្រមាណជាង ២លានដុល្លារ ខណៈការជួសជុល ប្រើប្រាស់ពេលវេលាជាង៨ ខែ ។ អាងហែលទឹក និងអាងលោតទឹក ត្រូវបានចាប់ផ្តើមដំណើរការ កាលពីឆ្នាំ១៩៦៧ ក៏បានទទួលរៀបចំ ធ្វើជាម្ចាស់ផ្ទះនៅកីឡា Games Ganefo អាស៊ីលើកទី១។ ក្នុងពិធីក្រុងពាលី ជួសជុល និងសាងសង់អាងហែលទឹក នៅពហុកីឡដ្ឋាន ជាតិអូឡាំពិក នៅថ្ងៃទី២៦ ខែតុលា ឆ្នាំ២០១៨ លោក ស៊ុន ចាន់ថុល បានឲ្យដឹងថា ការជួសជុល អាងហែលទឹកនេះ ឲ្យស្របទៅតាមអន្ដរជាតិ ដែលមានបណ្ដាយ៥០ម៉ែត្រ ទទឹង២៥ម៉ែត្រ និងខ្សែបន្ទាត់ចំនួន១០ផងដែរ។ លោកថា“ហើយការជួសជុលនេះ គឺប្រើថវិកាប្រហែល ជា២លានដុល្លារ សហរដ្ឋអាមេរិក និងមិនទាន់គិតទៅដល់គ្រឿង សំភារៈ ផ្សេងៗដែលយើងត្រូវទិញដាក់”។ យោងតាម ប្រវត្តិសង្ខេបអាងហែលទឹក ក្នុងពហុកីឡដ្ឋានជាតិអូឡាំពិក បានបញ្ជាក់ថា អាងហែលទឹក មានលក្ខណៈស្តង់ដារ កម្រិតអន្តរជាតិ មុនគេបង្អស់ នៅក្នុងប្រទេសកម្ពុជា នាពេលនោះ ដោយមានខ្នាត២១ម៉ែត្រ គុណនឹង៥០ម៉ែត្រ ស្មើនឹង០៨ ខ្សែបន្ទាត់ ព្រមទាំងមានអាងលោតទឹកមួយ មានឈ្នាន់លំនឹងសម្រាប់លោតកម្ពស់ ១០ម៉ែត្រ ។ អាងហែលទឹក និងអាងលោតទឹក គឺមានសកម្មភាពប្រកួត ជាពានរង្វាន់ជ្រើសរើស ជើងឯក ទាំងហែលទឹក លោតទឹក របាំក្នុងទឹក និងបាល់លេងក្នុងទឹកជារៀងរាល់ឆ្នាំនោះ ហើយក៏បានប្រកួត មិត្តភាពអន្តរជាតិហែលទឹក រវាងក្រុមជម្រើសជាតិកម្ពុជា និងក្រុមជម្រើសជាតិ ប្រទេសបារាំង ៕ ដោយ ៖ ធី លីថូ