កិច្ចពិភាក្សាកម្រិតគោលនយោបាយ ស្តីពី “យន្តការក្នុងការអភិវឌ្ឍប្រព័ន្ធប្រព្រឹត្តកម្មទឹកកខ្វក់នៅកម្ពុជា” រាជធានីភ្នំពេញ៖ នាថ្ងៃព្រហស្បតិ៍ ទី១៣ ខែវិច្ឆិកា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និង ឯកឧត្តម មាស សុខសេនសាន រដ្ឋលេខាធិការ ក្រសួងសេដ្ឋកិច្ចនិងហិរញ្ញវត្ថុ បានអញ្ជើញជាសហប្រធានដឹកនាំកិច្ចពិភាក្សាកម្រិតគោលនយោបាយ ស្តីពី “យន្តការក្នុងការអភិវឌ្ឍប្រព័ន្ធប្រព្រឹត្តកម្មទឹកកខ្វក់នៅកម្ពុជា”។ កិច្ចប្រជុំពិភាក្សានេះក៏មានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយក លោកអគ្គនាយករង និងមន្រ្តីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ និងមន្ត្រីពាក់ព័ន្ធរបស់ក្រសួងសាធារណការ និងដឹកជញ្ជូន ឯកឧត្តម លោក-លោកស្រី តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួង-ស្ថាប័នពាក់ព័ន្ធ តំណាងធនាគារពិភពលោក(World Bank) រដ្ឋបាលថ្នាក់ក្រោមជាតិ អង្គការ និងដៃគូអភិវឌ្ឍន៍នានា។ គោលបំណងនៃកិច្ចប្រជុំពិភាក្សានេះគឺ ដើម្បីពិនិត្យ និងពិភាក្សាផ្លាស់ប្ដូរយោបល់ ក្នុងការរៀបចំចង់ក្រងប្រមូលធាតុចូល តាមរយ:ចំណេះដឹង បទពិសោធន៍រវាងថ្នាក់ដឹកនាំ មន្ត្រីបច្ចេកទេស និងអ្នកជំនាញលើវិស័យទឹកកខ្វក់ សម្រាប់ជាយន្តការក្នុងការអភិវឌ្ឍប្រព័ន្ធប្រព្រឹត្តកម្មទឹកកខ្វក់នៅកម្ពុជា ឱ្យមានដំណើរការកាន់តែមានភាពល្អប្រសើរ ដើម្បីធានាឱ្យបាននូវសុខុមាលភាពសាធារណៈ និងបរិស្ថានល្អ សម្រាប់បច្ចុប្បន្ន និងតទៅអនាគត៕