(ព្រៃវែង)៖ ឯកឧត្តមនាយឧត្តមសេនីយ៍ ឈន សារ៉ាណេ អនុរដ្ឋលេខាធិការ ក្រសួងមហាផ្ទៃ នាព្រឹកថ្ងៃពុធ ទី១២ ខែវិច្ឆិកា ឆ្នាំ២០២៥នេះ បានអញ្ជើញចូលរួមក្នុងពិធីសម្ពោធដាក់អោយប្រើប្រាស់ ការងារសាងសង់ផ្លូវបេតុងចំនួន០២ខ្សែប្រវែង ៨.៨០៩ម៉ែត្រ អមដោយបង្គោលអំពូលសូឡាចំនួន ២៨៨ដើម និងចាក់សាបបេតុង ០១កន្លែង ទំហំ ២.៣៦០ម៉ែត្រការ៉េ ស្ថិតក្នុងឃុំពោធិ៍រៀង និងឃុំព្រែកអន្ទះ ស្រុកពោធិ៍រៀង ខេត្តព្រៃវែង ក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ស សុខា។ ឯកឧត្តមនាយឧត្តមសេនីយ៍ ឈន សារ៉ាណេ បានជម្រាបជូនអង្គពិធីជ្រាបថា ក្នុងយុទ្ធនាការឃោសនាបោះឆ្នោតថ្នាក់ជាតិនាថ្ងៃទី១១ ខែកក្កដា ឆ្នាំ២០២៣ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានណែនាំជាថ្មីដល់រូបខ្ញុំបាទ ជួយលើកកម្រិតផ្លូវនេះជាបេតុង សម្រាប់សម្រួលដល់ការធ្វើដំណើររបស់ប្រជាពលរដ្ឋ។ អនុវត្តតាមអនុសាសន៍ដ៏ខ្ពង់ខ្ពស់ របស់សម្តេចក្រឡាហោម ឯកឧត្តមនាយឧត្តមសេនីយ៍បានធ្វើការទំនាក់ទំនងដោយផ្ទាល់ជាមួយ ឯកឧត្តមឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ និងជាប្រធានក្រុមការងារថ្នាក់ជាតិចុះជួយស្រុកពោធិ៍រៀង ដើម្បីរឹះរកមធ្យោបាយសម្រាប់សាងសង់ផ្លូវនេះជាប្រភេទបេតុង តាមបំណងរបស់សម្តេចក្រឡាហោម។ ដោយមិនទាក់ទើរ ឯកឧត្តម ឧត្តមសេនីយ៍ឯកអគ្គនាយកបានយល់ព្រមសហការជាមួយកងវិស្វកម្ម របស់ខ្ញុំ ដើម្បីធ្វើការសាងសង់ផ្លូវបេតុងប្រវែង ៨ ៦០០ម៉ែត្រ ទទឹង ៨ម៉ែត្រ កម្រាស់បេតុង ០,២ម៉ែត្រ ហើយការងារនេះបានចាប់ផ្តើមបើកការដ្ឋាននាថ្ងៃទី០២ ខែធ្នូ ឆ្នាំ២០២៤ ហើយបានបញ្ចប់ការងារនៅថ្ងៃទី១០ ខែមេសា ឆ្នាំ២០២៥ នេះផងដែរ ។ ឯកឧត្តមនាយឧត្តមសេនីយ៍ ឈន សារ៉ាណេ សូមគោរពថ្លែងអំណរគុណយ៉ាងជ្រាលជ្រៅចំពោះ សម្តេចក្រឡាហោមឧត្តមប្រឹក្សាផ្ទាល់ព្រះមហាក្សត្រ ដែលបានផ្តួចផ្តើមគំនិត ក្នុងការស្ថាបនាផ្លូវបេតុងនេះឡើងទុកជាគុណប្រយោជន៍ជូនប្រជាពលរដ្ឋសម្រាប់ប្រើប្រាស់ និងសូមថ្លែងអំណរគុណយ៉ាងជ្រាលជ្រៅបំផុត ចំពោះវត្តមានដ៏ឧត្តុង្គឧត្តមរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ និងលោកជំទាវ កែសួន សុភី ស សុខា ព្រមទាំងប្រតិភូអមដំណើរទាំងអស់ ដែលបានចំណាយពេលវេលាដ៏មានតម្លៃ ក្នុងការចូលរួមក្នុងពិធីសម្ពោធដាក់ឲ្យប្រើប្រាស់នាថ្ងៃនេះ៕