ផ្លូវ​លំ​ជនបទចំនួន​ ៩ ខ្សែ ប្រវែង ៦៧ គីឡូម៉ែត្រ ក្នុង​ខេត្តពោធិ៍សាត់​បានបើកការដ្ឋានសាងសង់​ដែលជាគម្រោងរបស់រាជរដ្ឋាភិបាល តាមរយៈក្រសួងអភិវឌ្ឍន៍ជនបទ។ ពិធី​បើកការដ្ឋានសាងសង់បានធ្វើឡើងកាលពីថ្ងៃទី ១២ ខែវិច្ឆិកា ឆ្នាំ២០២៥ ដោយមានការចូលរួមពី​រដ្ឋមន្រ្តី​ក្រសួងអភិវឌ្ឍន៍ជនបទ, លោក ម៉ក់ រ៉ា ប្រធានក្រុមប្រឹក្សាខេត្តពោធិ៍សាត់ និង​ លោក ខូយ រីដា អភិបាលនៃគណៈអភិបាលខេត្ត​ពោធិ៍សាត់។ លោក ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទបាន​បញ្ជាក់ថា តាមរយៈសមិទ្ធផលទាំងនេះនឹងចូលរួម​​លើកកម្ពស់​ជីវភាព​ពលរដ្ឋ​ដែលរស់នៅក្នុងស្ថិតនៅក្រុងពោធិ៍សាត់, ស្រុកកណ្តៀង, ស្រុកបាកាន និងស្រុកវាលវែង​ឲ្យប្រសើរ​ថែមទៀត។លោករដ្ឋមន្រ្តី​បានលើកឡើងពី​ការ​យកចិត្តទុកដាក់ ក្នុង​ការ​លើកកម្រិតគុណភាពហេដ្ឋារចនាសម្ព័ន្ធ និងគមនាគមន៍ជនបទ ដូចពាក្យស្លោក “មានផ្លូវគឺមានក្តីសង្ឃឹម”។ ជាក់ស្ដែង​ផ្លូវកៅស៊ូពីរជាន់និងបេតុងចំនួន ៩ ខ្សែ ដែល​សាងសង់ក្នុងតម្លៃប្រមាណ ១៤ លានដុល្លារអាមេរិក នឹងផ្តល់ផលប្រយោជន៍ជូនប្រជាពលរដ្ឋប្រមាណ ៤៦ ៥០០ គ្រួសារ ស្មើនឹងប្រមាណ ២០ម៉ឺននាក់។ទន្ទឹមការ​បើកការដ្ឋានសាងសង់ផ្លូវក្រាលកៅស៊ូពីរជាន់ (DBST) និងបេតុងចំនួន ៩ ខ្សែ ប្រវែង ៦៧ គីឡូម៉ែត្រក្នុង​ខេត្តពោធិ៍សាត់ ក៏មានការ​សម្ពោធដាក់ឱ្យប្រើប្រាស់ស្ពានបេតុង ១ កន្លែង ប្រវែង ៧៥ ម៉ែត្រ ស្ថិតនៅភូមិស្ពាន ឃុំ​កណ្តៀង ទៅភូមិព្រៃក្តី ឃុំអន្លង់វិល ស្រុកកណ្តៀង ខេត្តពោធិ៍សាត់។លោក ជ្រាយ ប៉ុម អគ្គនាយកបច្ចេកទេសបានបញ្ជាក់​ថា ស្ពានបេតុងប្រវែង ៧៥ ម៉ែត្រ ទទឹង ៨ម៉ែត្រ និងផ្លូវបេតុងសងខាងក្បាលស្ពានប្រវែងសរុប ២២៩ ម៉ែត្រ ស្ថិតនៅភូមិស្ពាន ឃុំកណ្តៀង ទៅភូមិព្រៃក្តី ឃុំអន្លង់វិល ស្រុកកណ្តៀង ខេត្តពោធិ៍សាត់ ស្ថិតនៅក្នុងក្របខ័ណ្ឌក្រសួងអភិវឌ្ឍន៍ជនបទ។ ដោយឡែក ផ្លូវចំនួន ៩ ខ្សែ ដែល​បានបើកការដ្ឋាន​សាងសង់​មានប្រវែង​សរុប ៦៧ គីឡូម៉ែត្រ ក្នុងនោះផ្លូវចំនួន ៣ ខ្សែ ប្រវែងសរុប ២៤ គីឡូម៉ែត្រ ស្ថិតក្នុងគម្រោងគ្រប់គ្រងគ្រោះមហន្តរាយនៅកម្ពុជា និងអាស៊ីអាគ្នេយ៍ ជំហាន​២ (CSADRMP2) និងផ្លូវចំនួន ៦ ខ្សែទៀត មានប្រវែងសរុបប្រមាណ ៤៣ គីឡូម៉ែត្រ ស្ថិតក្នុងក្របខ័ណ្ឌគម្រោងគាំទ្រនិរន្តរភាព​ហេដ្ឋារចនាសម្ព័ន្ធជនបទ ដើម្បីទីផ្សារកសិករនិងពាណិជ្ជូបនីយកម្មកសិកម្ម (SAAMBAT) នៃក្រសួងអភិវឌ្ឍន៍​ជនបទ៕