សិក្ខាសាលាផ្សព្វផ្សាយ និងជំរុញការអនុវត្ត “ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មនៅកម្ពុជា ឆ្នាំ ២០២៣-២០៣៣” លើកទី៣ ខេត្តស្វាយរៀង៖ នារសៀលថ្ងៃសុក្រ ទី៣១ ខែតុលា ឆ្នាំ២០២៥ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជា គណៈអធិបតី ក្នុងពិធីបើកសិក្ខាសាលាផ្សព្វផ្សាយ និងជំរុញការអនុវត្ត “ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយនិងភស្ដុភារកម្មនៅកម្ពុជា ឆ្នាំ២០២៣-២០៣៣” ដោយមានការអញ្ជើញចូលរួមពីថ្នាក់ដឹកនាំក្រសួង, តំណាងគណៈអភិបាលខេត្ត តំណាងមន្ទីរពាក់ព័ន្ធ តំណាងសភាពាណិជ្ជកម្មទាំង ៥ ខេត្ត មានដូចជា ៖ ខេត្តកណ្ដាល ខេត្តតាកែវ ខេត្តត្បូងឃ្មុំ ខេត្តស្វាយរៀង និងខេត្តព្រៃវែង និងមន្ត្រីជំនាញពាក់ព័ន្ធ នៃអគ្គនាយកដ្ឋានភស្តុភារកម្ម។ សិក្ខាសាលានេះ ត្រូវបានរៀបចំឡើងក្នុងគោលបំណងផ្សព្វផ្សាយផែនការមេ ដល់គ្រប់ភាគីពាក់ព័ន្ធលើគម្រោងដែលបានចែងក្នុងផែនការមេសរុបចំនួន ១៧៤គម្រោង ដោយបែងចែកជា ០២ដំណាក់កាលសម្រាប់ការអនុវត្តជា ដូចជា (១) គម្រោងអនុវត្តរយៈពេលខ្លី និងមធ្យម (ចាប់ពីឆ្នាំ២០២៣-២០២៧) និង (២) គម្រោងរយៈពេលវែង (ចាប់ពីឆ្នាំ២០២៨-២០៣៣) និងជំរុញដល់គ្រប់ភាគីពាក់ព័ន្ធសម្រាប់ជួយផ្សព្វផ្សាយបន្តដល់វិនិយោគិន ដើម្បីចាប់យកឱកាសវិនិយោគផងដែរ។ ថ្លែងក្នុងឱកាសនោះ ឯកឧត្តមរដ្ឋលេខាធិការ មានក្ដីសង្ឃឹមយ៉ាងមុតមាំថា តាមរយៈសិក្ខាសាលានេះ សិក្ខាកាមចូលរួមទាំងអស់ យល់ដឹងពីគោលដៅ ក៏ដូចជាសារៈសំខាន់នៃគម្រោងនានាមានក្នុង “ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣” ដើម្បីប្រទេសកម្ពុជា ឆ្ពោះទៅកាន់ចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០៕