រដ្ឋបាលខេត្តកែប បានបើកការដ្ឋានសាងសង់ផ្លូវបេតុងសរសៃដែកមួយខ្សែ មានប្រវែង ១,៨៣០ ម៉ែត្រ ទទឹង ៦ ម៉ែត្រ និងកម្រាស់ ០.១៥ ម៉ែត្រ ស្ថិតនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប។ ពិធីបើកការដ្ឋានធ្វើឡើងនៅព្រឹកថ្ងៃទី២៨ ខែតុលា ឆ្នាំ២០២៥ ក្រោម អធិបតីភាពឯកឧត្តម អ៊ុក ថា ប្រធានក្រុមប្រឹក្សាខេត្ត និងឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប និងមានការចូលរួមពី លោក លោកស្រី អភិបាលរងខេត្ត អភិបាលក្រុង ស្រុក ប្រធានមន្ទីរអង្គភាពជុំវិញខេត្ត កងកម្លាំងទាំងបី ចៅសង្កាត់ មេភូមិ និងប្រជាពលរដ្ឋផងដែរ។ ក្នុងឱកាសនោះ ឯកឧត្តមបណ្ឌិត សោម ពិសិដ្ឋ បានមានប្រសាសន៍ថា ការសាងសង់ផ្លូវបេតុងសរសៃដែកនេះ មានសារៈសំខាន់ខ្លាំង ក្នុងការជួយសម្រួលដល់ការធ្វើដំណើររបស់ប្រជាពលរដ្ឋក្នុងភូមិ និងអ្នកនៅជុំវិញ។ គម្រោងនេះបានបង្ហាញអោយឃើញពីការការយកចិត្តទុកដាក់យ៉ាងជ្រាលជ្រៅរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រួមទាំងរដ្ឋបាលខេត្តកែប និងភាគីពាក់ព័ន្ធទាំងអស់ ដែលបានខិតខំអភិវឌ្ឍសង្គម ដើម្បីលើកកម្ពស់ជីវភាព និងភាពងាយស្រួលរបស់ប្រជាពលរដ្ឋនៅតាមមូលដ្ឋាន។ តាមរបាយការណ៍របស់ លោក ឈុន ច័ន្ទវ៉ាន់ថុន នាយករដ្ឋបាលសាលាខេត្តកែប បានឲ្យដឹងថា គម្រោងសាងសង់ផ្លូវនេះ ស្របតាមផែនការយុទ្ធសាស្ត្ររយៈពេល៥ឆ្នាំ និងកម្មវិធីវិនិយោគបីឆ្នាំរំកិលរបស់រដ្ឋបាលខេត្ត។ ក្នុងឆ្នាំ២០២៥ នេះ រដ្ឋបាលខេត្តកែបក៏បានប្រើប្រាស់ថវិកាប្រចាំឆ្នាំ ដើម្បីអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធ និងគម្រោងសាធារណៈជាច្រើនផ្សេងទៀត សម្រាប់ជាប្រយោជន៍ដល់ប្រជាពលរដ្ឋទូទាំងខេត្តកែប៕