វគ្គបណ្តុះបណ្តាល និងទស្សនកិច្ចសិក្សា ស្តីពីការគ្រប់គ្រងការវិនិយោគសាធារណៈ នៅសាលាគោលនយោបាយ និងគ្រប់គ្រងសាធារណៈ នៃសាធារណរដ្ឋកូរ៉េ សាធារណរដ្ឋកូរ៉េ៖ ចាប់ពីថ្ងៃទី២០-២៤ ខែតុលា ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈក្រសួងសាធារណការ និងដឹកជញ្ជូន បានដឹកនាំគណៈប្រតិភូជាន់ខ្ពស់របស់ក្រសួង ចូលរួមវគ្គបណ្តុះបណ្តាល និងទស្សនកិច្ចសិក្សាស្តីពីការគ្រប់គ្រងការវិនិយោគសាធារណៈ នៅសាលាគោលនយោបាយ និងគ្រប់គ្រងសាធារណៈនៃសាធារណរដ្ឋកូរ៉េ ដែលសម្របសម្រួលរៀបចំដោយអគ្គលេខាធិការដ្ឋាននៃគណៈកម្មការដឹកនាំការកែទម្រង់ការគ្រប់គ្រងហិរញ្ញវត្ថុសាធារណៈ។ ដំណើរទស្សនកិច្ចនេះ ក្នុងគោលបំណងដើម្បីសិក្សាស្វែងយល់ និងដកស្រង់បទពិសោធន៍ជោគជ័យរបស់សាធារណរដ្ឋកូរ៉េ ក្នុងការរៀបចំបង្កើតគោលនយោបាយ ការគ្រប់គ្រងស្ថាប័ន និងការអនុវត្តកម្មវិធីវិនិយោគសាធារណៈ ក្រោមក្របខ័ណ្ឌនៃការគ្រប់គ្រងហិរញ្ញវត្ថុសាធារណៈ ប្រកបដោយប្រសិទ្ធភាព ស័ក្តសិទ្ធិភាព តម្លាភាព គណនេយ្យភាព និងចីរភាពនៃការបែងចែក និងប្រើប្រាស់ធនធានសាធារណៈ ស្របតាមឧត្តមានុវត្តន៍អន្តរជាតិ និងបរិការណ៍ជាក់ស្តែងរបស់កម្ពុជា។ វគ្គបណ្តុះបណ្តាល និងទស្សនកិច្ចសិក្សាខាងលើនេះ ក៏មានការចូលរួមផងដែរពីថ្នាក់ដឹកនាំដែលជាតំណាងមកពីក្រសួង-ស្ថាប័ននៃរាជរដ្ឋាភិបាលកម្ពុជា។ នៅក្នុងដំណើរបេសកកម្មខាងលើនេះ គណៈប្រតិភូកម្ពុជា ក៏បានទៅទស្សនកិច្ចសិក្សានៅអគារសាធារណៈសំខាន់ៗ តំបន់ប្រវត្តិសាស្រ្ត និងគម្រោងវិនិយោគសាធារណៈធំៗ មួយចំនួន រួមមាន៖ ហេដ្ឋារចនាសម្ព័ន្ធស្ពាន កំពង់ផែ ភស្តុភារកម្ម និងព្រលានយន្តហោះ នៅក្នុងទីក្រុងសេអ៊ូល (Seoul) និងទីក្រុងអ៊ីនឈុន (Incheon)៕