សកម្មភាពរបស់ក្រុមការងារ ស.ស.យ.ក វិស័យសាធារណការ និងដឹកជញ្ជូន ចុះបើកវគ្គបណ្តុះបណ្តាលស្តីពីសុវត្ថិភាពចរាចរណ៍ផ្លូវគោក អប់រំផ្សព្វផ្សាយដល់សមាជិក សមាជិកា ស.ស.យ.ក ខេត្តកំពង់ចាម ដែលមានអ្នកចូលរួមប្រមាណ ១០០ នាក់ កំពង់ចាម ៖ នៅថ្ងៃទី១៦ ខែតុលា ឆ្នាំ២០២៥ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាអនុប្រធានផ្នែកដឹកជញ្ជូននៃ ស.ស.យ.ក វិស័យសាធារណការ និងដឹកជញ្ជូន បានដឹកនាំក្រុមការងារផ្នែកដឹកជញ្ជូន សហការជាមួយ ក្រុមការងារ ស.ស.យ.ក ខេត្តកំពង់ចាម ដឹកនាំដោយ លោក អ៊ឹង ទី នស្តីទី ស.ស.យ.ក. ខេត្តកំពង់ចាម បានរៀបចំបើកវគ្គបណ្តុះបណ្តាលស្តីពីសុវត្ថិភាពចរាចរណ៍ផ្លូវគោក អប់រំផ្សព្វផ្សាយដល់សមាជិក សមាជិកា ស.ស.យ.ក ខេត្ត ដោយមានការចូលរួមពី លោក ផេង ដារ៉េន អនុប្រធានមន្ទីរសាធារណការ និងដឹកជញ្ជូនខេត្ត និង សិក្ខាកាមដែលជាយុវជន ស.ស.យ.ក. សរុបប្រមាណ ១០០ នាក់។ វគ្គបណ្តុះបណ្តាលនេះ មានគោលបំណងអប់រំផ្សព្វផ្សាយស្តីពី សុវត្ថិភាពចរាចរណ៍ផ្លូវគោក ក្នុងន័យលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោក ដល់សមាជិក សមាជិកា ស.ស.យ.ក. ខេត្ត និងដើម្បីយកចំណេះដឹងនេះទៅអប់រំ ផ្សព្វផ្សាយបន្តដល់យុវជនដទៃទៀត។ ប្រធានបទដែលយកមកអប់រំផ្សព្វផ្សាយរួមមាន៖ ស្ថានភាពទូទៅនៃគ្រោះថ្នាក់ចរាចរណ៍ផ្លូវគោក សុជីវធម៌ក្នុងការបើកបរ ការប្រើប្រាស់ល្បឿនក្នុងការបើកបរ សិទ្ធិអាទិភាពនៅត្រង់ផ្លូវប្រសព្វ ហានិភ័យនៃការបើកបរក្រោមឥទ្ធិពលនៃគ្រឿងស្រវឹង ការយល់ដឹងអំពីសុវត្ថិភាពក្នុងពេលបើកបរយានយន្ត អត្ថប្រយោជន៍នៃមួកសុវត្ថិភាព ការត្រួតពិនិត្យទោចក្រយានយន្ត និងកម្មវិធីយល់ដឹងអំពីទ្រឹស្តីនៃការបើកបរលើទូរស័ព្ទដៃ (Cambodia Driving Rules)។ ជាលទ្ធផល តាមរយៈការស្ទង់មតិអំពីចំណេះដឹងពាក់ព័ន្ធនឹងការបណ្តុះបណ្តាលច្បាប់ស្តីពីចរាចរណ៍ផ្លូវគោកនេះ បានបង្ហាញថា មុនវគ្គបណ្តុះបណ្តាល សមាជិក សមាជិកាឆ្លើយសំណួរបានត្រឹមត្រូវមានចំនួន ៥៤% និងក្រោយពីទទួលការបណ្តុះបណ្តាលរួច សមាជិក សមាជិកាឆ្លើយសំណួរបានត្រឹមត្រូវមានចំនួន ៨៧%៕