កិច្ចប្រជុំប្រមូលធាតុចូលក្នុងការរៀបចំអភិវឌ្ឍន៍ "ប្រព័ន្ធវិក្កយបត្រឌីជីថល (MPWT Digital Invoice)" សម្រាប់សេវាសាធារណៈ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាថ្ងៃអង្គារទី១៤ ខែតុលា ឆ្នាំ២០២៥ ឯកឧត្តម នឹម សុធា អនុរដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំប្រមូលធាតុចូលក្នុងការរៀបចំអភិវឌ្ឍន៍ "ប្រព័ន្ធវិក្កយបត្រឌីជីថល (MPWT Digital Invoice)" សម្រាប់សេវាសាធារណៈ របស់ក្រសួងសាធារណការ និងដឹកជញ្ជូន។ កិច្ចប្រជុំនេះ មានការចូលរួមពីលោក-លោកស្រីតំណាងអគ្គនាយកដ្ឋានរដ្ឋបាល និងហិរញ្ញវត្ថុ តំណាងអគ្គនាយកដ្ឋានបច្ចេកទេស តំណាងអគ្គនាយកដ្ឋានដឹកជញ្ជូនផ្លូវគោក តំណាងអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងតំណាងអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ។ អង្គប្រជុំបានពិនិត្យ និងពិភាក្សាផ្ដល់ធាតុចូលលើការរៀបចំអភិវឌ្ឍន៍ "ប្រព័ន្ធវិក្កយបត្រឌីជីថល (MPWT Digital Invoice)" សម្រាប់សេវាសាធារណៈ របស់ក្រសួងសាធារណការ និងដឹកជញ្ជូន ស្របតាមគោលនយោបាយ របស់រាជរដ្ឋាភិបាល ក្នុងការជំរុញការផ្ដល់សេវាសាធារណៈ និងប្រមូលចំណូលពីសេវាសាធារណៈ តាមរយៈការប្រើប្រាស់ប្រព័ន្ធបច្ចេកវិទ្យា ប្រកបដោយភាពងាយស្រួល និងមានប្រសិទ្ធភាពខ្ពស់។ ឯកឧត្តមអនុរដ្ឋលេខាធិការ បានណែនាំឱ្យក្រុមការងារទាំងអស់ បន្តសហការលើកិច្ចការងារអភិវឌ្ឍប្រព័ន្ធបច្ចេកវិទ្យា របស់ក្រសួងសាធារណការ និងដឹកជញ្ជូន ឱ្យដំណើរការក្នុងការផ្ដល់សេវាសាធារណៈ កាន់តែល្អប្រសើរ ព្រមទាំងលើកទឹកចិត្តជំរុញការងារសម្រេចលទ្ធផលតាមពេលវេលាដែលបានគ្រោងទុក៕