កំពង់ឆ្នាំង ថ្ងៃទី១០ ខែតុលា ឆ្នាំ២០២៥-- ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីភាពក្នុងពិធីសម្ពោធដាក់ឱ្យប្រើប្រាស់គម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងកំពង់ឆ្នាំងដែលមានតម្លៃជិត២០លានដូល្លាក្រោមកម្ចីហិរញ្ញប្បទានពីធនាគារអភិវឌ្ឍន៍អាស៊ី ADB តាមរយៈក្រសួងសាធារណការ និងដឹកជញ្ជូន ត្រូវបានដាក់ឱ្យប្រើប្រាស់ នាថ្ងៃទី១០ ខែតុលា ឆ្នាំ២០២៥ ដោយមានការអញ្ជើញចូលរួមពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្តម ស៊ីវ រុន ប្រធានក្រុមប្រឹក្សាខេត្ត ប្រតិភូក្រសួងសាធារណការនិងដឹកជញ្ជូន លោក លោកស្រីថ្នាក់ដឹកនាំមន្ទីរអង្គភាពជុំវិញខេត្ត អភិបាលក្រុង ស្រុក និង ប្រជាពលរដ្ឋជាច្រើននាក់ផងដែរ។ ក្នុងឱកាសនោះ ឯកឧត្តម ប៉េង ពោធិ៍នា បានមានប្រសាសន៍ថា ស្ថានីប្រព្រឹត្តកម្មទឹកកខ្វក់ ជាចំណែកមួយនៃហេដ្ឋារចនាសម្ព័ន្ធរួមដែលយើងចាំបាច់ត្រូវធ្វើដើម្បីទ្រទ្រង់កំណើនសេដ្ឋកិច្ច និងបង្កើតការងារជូនបងប្អូនប្រជាពលរដ្ឋ បច្ចុប្បន្នកំពុងវិលត្រឡប់មកពីប្រទេសក្រៅផងដែរ។ ក្រោមការដឹកនាំរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចំពោះកិច្ចខិតខំប្រឹងប្រែងដែលបានលះបង់កម្លាំងកាយចិត្ត និងប្រាជ្ញា ធ្វើឱ្យប្រទេសជាតិមានការរីកចម្រើនលើគ្រប់វិស័យ ក្នុងការដឹកនាំប្រទេស ក៏ដូចជាការខិតខំប្រឹងប្រែងសម្រេចបាននូវសមិទ្ធផលជាច្រើនហេដ្ឋារចនាសម្ព័ន្ធនានាលើគ្រប់វិស័យ ស្ថានីយប្រព្រឹត្តកម្មទឹកកខ្វក់ដែលសម្ពោធនាពេលនេះជាដើម។ទន្ទឹមនឹងនេះ ឯកឧត្តមបានបន្តថា ចំពោះស្ថានីយប្រព្រឹត្តកម្មទឹកកខ្វក់ខេត្តកំពង់ឆ្នាំងបាន និងកំពុងដាក់ឱ្យដំណើរការប្រើប្រាស់ ខណៈដែលអាងប្រព្រឹត្តកម្មទឹកកខ្វក់ទាំងនេះ បានចាប់អារម្មណ៍សម្រាប់ថ្នាក់ជាតិនិងអន្តរជាតិ ដែលជាការបង្ហាញពីការខិតខំប្រឹងប្រែងរបស់រាជរដ្ឋាភិបាលកម្ពុជា ដើម្បីធ្វើឱ្យខេត្តកំពង់ឆ្នាំងកាន់តែមានបរិស្ថានល្អប្រសើរ ហើយប្រើប្រាស់បច្ចេកវិទ្យាក្នុងការសាងសង់ស្ថានីយ៍ប្រព្រឹត្តិកម្មទឹកកខ្វក់កាន់តែទំនើប។ក្នុងបរិបទនេះដែរ ឯកឧត្តមរដ្ឋមន្ត្រី បានជំរុញឱ្យបងប្អូនប្រជាពលរដ្ឋទាំងអស់ចុលរួមសហការ មិនបំពុលបរិស្ថានហូរចូលទៅក្នុងអាង ឬប្រព័ន្ធលូចម្រោះទឹកដែលបានចម្រោះរួច៕