(ពោធិ៍សាត់)៖ លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងលោក ហេង សុភាណា អភិបាលរងនៃគណៈអភិបាលខេត្តពោធិ៍សាត់ នាថ្ងៃទី០៨ ខែតុលា ឆ្នាំ២០២៥នេះ នៅសាលប្រជុំមន្ទីរសាធារណការ និងដឹកជញ្ជូនខេត្ត បានអញ្ជើញជាគណៈអធិបតី ក្នុងកិច្ចប្រជុំផ្សព្វផ្សាយអំពីច្បាប់ និងលិខិតបទដ្ឋានគតិយុត្តិនានា ពាក់ព័ន្ធនឹងការដឹកជញ្ជូនលើសទម្ងន់កំរិតកំណត់ ជូនអ្នកពាក់ព័ន្ធក្នុងខេត្តពោធិ៍សាត់។ កិច្ចប្រជុំផ្សព្វផ្សាយនេះ បានការចូលរួមពី អនុរដ្ឋលេខាធិការក្រសួងសាធារណការ និងដឹកជញ្ជូន, ប្រធានលេខាធិការដ្ឋាន នៃគណៈកម្មាធិការសម្របសម្រួលអចិន្រ្តៃយ៍, លោកប្រធានមន្ទីរស្តីទី, អភិបាល អភិបាលរង ក្រុងស្រុកទាំង៧, មន្ទីរអង្គភាព និងមន្រ្តីជំនាញពាក់ព័ន្ធ, សិស្សនិស្សិត, ម្ចាស់ការដ្ឋានអាជីវកម្មថ្ម, ដេប៉ូខ្សាច់, គ្រឿងសំណង់, ដេប៉ូប្រមូលទិញកសិផល, អាជីវកម្មជីកយកអាចម៏ដី និងម្ចាស់រោងម៉ាស៊ីនកិនស្រូវ ក្នុងភូមិសាស្រ្តខេត្តពោធិ៍សាត់ ប្រមាណ៨៧នាក់។ ក្នុងគោលបំណងនៃកិច្ចប្រជុំ គឺដើម្បីផ្សព្វផ្សាយអំពីច្បាប់ បទដ្ឋានគតិយុត្ត និងបច្ចេកទេសពាក់ព័ន្ធនឹងការងារដឹកជញ្ជូនលើសទម្ងន់កម្រិតកំណត់ ដែលរួមមានច្បាប់ស្តីពីផ្លូវថ្នល់ មាត្រា២៦ មាត្រា៦០ រចនាសម្ព័ន្ធគ្រប់គ្រង របស់គណៈកម្មាធិការដឹកជញ្ជូនលេីសទម្ងន់ សេចក្តីជូនដំណឹងលេខ០១០ សក.សជណ.គតលទ ចុះថ្ងៃទី១៨ ខែមីនា ឆ្នាំ២០២៥ ស្តីពីការដោះលែង និងរឹតបន្តឹងការអនុវត្តច្បាប់ លេីយានយន្តដឹកជញ្ជូនលេីសទម្ងន់កំរិតកំណត់ សេចក្តីជូនដំណឹងលេខ០៥២ សក.សជណ.គតលទ ចុះថ្ងៃទី១៨ ខែកក្កដា ឆ្នាំ២០២៥ ស្តីពីការចូលរួមទប់ស្កាត់ការដឹកជញ្ជូនលេីសទម្ងន់កំរិតកំណត់ អំពីទម្ងន់អនុញ្ញាតផ្ទុកតាមប្រភេទយានយន្ត និងភ្លៅនីមួយៗ និងទណ្ឌកម្មពិន័យចំពោះយានយន្តដឹកលេីសទម្ងន់ផងដែរ។ ថ្លែងក្នុងកិច្ចប្រជុំ លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន បានសម្តែងនូវការកោតសរសេីរ និងវាយតម្លៃខ្ពស់ ចំពោះការខិតខំប្រឹងប្រែងចូលរួមទប់ស្កាត់ការដឹកជញ្ជូនលេីសទម្ងន់ ពីសំណាក់អាជ្ញាធរដែនដីគ្រប់លំដាប់ថ្នាក់ និងសមត្ថកិច្ចពាក់ព័ន្ធទាំងអស់ និងសូមបន្តចូលរួមផ្សព្វផ្សាយ អប់រំ ណែនាំដល់អាជីវករ និងម្ចាស់អាជីវកម្មពាក់ព័ន្ធនឹងការដឹកជញ្ជូនលើសទម្ងន់កំរិតកំណត់ ក្នុងដែនសមត្ថកិច្ចរបស់ខ្លួន ឱ្យបានទូលំទូលាយបន្ថែមទៀត។ លោករដ្ឋលេខាធិការបន្តថា ការដឹកលើសទម្ងន់ វាបានជះឥទ្ធិពលអាក្រក់ ក្រៅពីការបំផ្លាញផ្លូវថ្នល់ វាបានបង្កជាផលប៉ះពាល់ដល់សុវត្ថិភាពអាយុជីវិតប្រជាជន និងសេដ្ឋកិច្ចសង្គមជាតិទាំងមូល។ បើទោះបីជាយ៉ាងនេះក្តី រាជរដ្ឋាភិបាលកម្ពុជា នៅតែរក្សាឥរិយាបទទន់ភ្លន់ នៅក្នុងការផ្សព្វផ្សាយអប់រំដល់ប្រជាពលរដ្ឋ អំពីច្បាប់គតិយុត្តនានា ដោយសំដៅធ្វើយ៉ាងណាមិនឱ្យប៉ះពាល់ដល់ការប្រកបអាជីវកម្មទទួលទានចិញ្ចឹមជីវិត របស់ប្រជាពលរដ្ឋឡើយ៕