វិទ្យុជាតិកម្ពុជា៖ មន្ទីរព័ត៌មានខេត្តបាត់ដំបង អាជ្ញាធរខេត្តបាត់ដំបង ត្រៀមពង្រីកផ្លូវពីទីតាំងរង្វង់មូល ព្រាបសន្តិភាព រហូតដល់ផ្លូវជាតិលេខ៥ថ្មី និងរង្វង់មូលនាងរំសាយសក់ ដល់ផ្លូវបំបែកអាងកំពីងពួយ ដើម្បីសម្រួលដល់ការធ្វើដំណើរលើដងផ្លូវក្នុងខេត្ត និងលើកសោភណភាពតាមទីប្រជុំជន ។ ការផ្សាយរបស់រដ្ឋបាលខេត្ត បាត់ដំបងកាលពីថ្ងៃទី០១ខែ កញ្ញា បានឱ្យដឹងថា ឯកឧត្តម សុខ លូ បានដឹកនាំក្រុមការងារ ចុះត្រួតពិនិត្យស្ថានភាពផ្លូវនៅទីតាំងសំខាន់ៗមួយចំនួនក្នុងខេត្តបាត់ដំបង ដើម្បីត្រៀមពង្រីកផ្លូវបន្ថែម ក្នុងនោះគម្រោងពង្រីកកំណាត់ផ្លូវពីទីតាំងរង្វង់មូល«ព្រាបសន្តិភាព» រហូតដល់ផ្លូវជាតិលេខ៥ថ្មី និងរង្វង់មូលនាងរំសាយសក់ ដល់ផ្លូវបំបែកអាងកំពីងពួយ ដើម្បីរៀបចំសណ្តាប់ធ្នាប់របៀបរៀបរយសម្រួលដល់ការធ្វើដំណើរលើដងផ្លូវក្នុងខេត្ត និងលើកសោភណភាពនៅតាមទីប្រជុំជន។ ឯកឧត្តម សុខ លូ បានណែនាំបន្ថែមដល់លោក អភិបាលក្រុង ស្រុក ត្រូវខិតខំរៀបចំសណ្តាប់ធ្នាប់តាមដងផ្លូវដើម្បីរក្សាដីចិញ្ចើមផ្លូវ ចៀសវាងការរំលោភបំពានលើដីចំណីផ្លូវ។បន្ទាប់មក ឯកឧត្តម សុខ លូ អភិបាល ខេត្តបាត់ដំបង ក៏បន្តដំណើរចុះត្រួតពិនិត្យសណ្តាប់ធ្នាប់ និងរបៀបរៀបរយ នៅបរិវេណតំបន់រមណីយដ្ឋានប្រវត្តិសាស្ត្រភ្នំសំពៅ ដែលជាទីតាំងកំពុង ស្រូបទាញ ភ្ញៀវទេសចរជាតិ អន្តរជាតិមកទស្សនាកម្សាន្ត ផងដែរ៕