ការស្ថាបនាសាងសង់អនុគម្រោងសាងសង់បណ្តាញលូ និងស្ថានីយបូមទឹកភ្លៀងក្រុងក្រចេះនៃគម្រោងអភិវឌ្ឍន៍ក្រុងរបៀង ៤ ក្រោមជំនួយពី ADB សម្រេចបានប្រមាណ ២១,២៥ ភាគរយ។ការងារសាងសង់បណ្ដាញលូ និងស្ថានីយបូមទឹកភ្លៀងនេះ គឺទី១-ការសាងសង់អគារស្ថានីយបូមមួយកន្លែង មានទំហំ ១៦.៧ម៉ែត្រx៣០ម៉ែត្រ, ២- សំណង់មាត់ឈ្នាងបង្ហូរទឹកចេញពីស្ថានីយទំហំ ១៣.៤ម៉ែត្រx១៨.៥ម៉ែត្រ, ៣- ការបំពាក់ម៉ាស៊ីនបូមទឹកចំនួន ៣ ម៉ាស៊ីន មានសមត្ថភាពបូមទឹកបាន ១០៣៨០ ម៉ែត្រគូបក្នុងមួយម៉ោង, ៤- ផ្លូវបេតុងចូលស្ថានីយប្រវែង ១១០ ម៉ែត្រ ទទឹងផ្លូវ ៧.៥ ម៉ែត្រ, ៥- សាងសង់បណ្ដាញលូបេតុងប្រអប់មេប្រវែង ១១២៣ ម៉ែត្រ, ៦- សាងសង់បណ្ដាញលូប្រមូលទឹកតភ្ជាប់ជាមួយបណ្ដាញលូចាស់ប្រវែង ៤៩៦ម៉ែត្រ, ៧- សាងសង់ប្រឡាយទឹករៀបថ្ម ទំហំទទឹងបាត្រប្រឡាយ ១.៥ម៉ែត្រ ជម្រៅ ៣ម៉ែត្រ ប្រវែង ២២០ម៉ែត្រ។ការសាងសង់ប្រព័ន្ធរំដោះទឹកភ្លៀងក្រុងក្រចេះក្នុងគោលបំណង គឺដើម្បីរំដោះទឹកភ្លៀងពីក្នុងក្រុងក្រចេះទាំងមូល ការពារការជន់លិចក្នុងរដូវវស្សា ហើយប្រព័ន្ធនេះជួយបញ្ជៀសការលិចលង់ក្នុងក្រុង លើកកម្ពស់អនាម័យសុខភាព និងជីវភាពប្រជាជនក៏ដូចជាជួយជំរុញសេដ្ឋកិច្ចក្នុងក្រុងទាំងមូល។ អនុគម្រោងសាងសង់បណ្តាញលូ និងស្ថានីយបូមទឹកភ្លៀងក្រុងក្រចេះ នៃគម្រោងអភិវឌ្ឍន៍ក្រុងរបៀង ៤ ចាប់ផ្តើមបើកការដ្ឋានសាងសង់កាលពីថ្ងៃទី៥ ខែមីនា ឆ្នាំ២០២៥ ក្រោមជំនួយពី ADB ដែលចំណាយថវិកាប្រមាណជា ៧ លានដុល្លារ។ តាមការបញ្ជាក់បន្ថែមពីអាជ្ញាធរខេត្តក្រចេះ ដោយមានជំនួយគាំទ្រពីធនាគារអភិវឌ្ឍន៍អាស៊ី (ADB) និងក្រុមការងារបច្ចេកទេសនៃក្រសួងសាធារណការ និងដឹកជញ្ជូន ខេត្តក្រចេះទទួលបានគម្រោងរួមមាន៖ ទីលានទុកដាក់សំរាមក្រុងក្រចេះ ដែលបានសាងសង់រួចរាល់, គម្រោងសាងសង់ប្រព័ន្ធលូរំដោះទឹកភ្លៀងក្រុងក្រចេះ ដែលកំពុងដំណើរការសាងសង់ និងគម្រោងរៀបចំកែលម្អឡើងវិញនូវរង្វង់មូលព្រាបស, អនុគម្រោងដាក់បង់អង្គុយ និងអំពូលភ្លើងប្រើពន្លឺសូឡាតាមមាត់ទន្លេ, គម្រោងរៀបចំកែលម្អឡើងវិញនូវរង្វង់មូលនាគបាញ់ទឹក និងរៀបចំទីកន្លែងសម្រាប់ហាត់ប្រាណ និងកន្លែងសម្រាប់ក្មេងលេង ដែលបានបើកការដ្ឋានសាងសង់នាថ្ងៃទី១៥ ខែកញ្ញា ឆ្នាំ២០២៥ ម្សិលម៉ិនេះ៕