កិច្ចប្រជុំដំបូង នៃក្រុមការងារកែទម្រង់ប្រព័ន្ធគ្រប់គ្រងការវិនិយោគសាធារណៈរបស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាថ្ងៃអង្គារ ទី២ ខែកញ្ញា ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ និងជាប្រធានក្រុមការងារកែទម្រង់ប្រព័ន្ធគ្រប់គ្រងការវិនិយោគសាធារណៈរបស់ក្រសួងសាធារណការ និងដឹកជញ្ជូន (ហៅកាត់ថា ក.កគវស.សកដ.) បានអញ្ជើញដឹកនាំកិច្ចប្រជុំដំបូងនៃ ក.កគវស.សកដ. ដែលមានការចូលរួមពី ឯកឧត្តម លោកជំទាវ លោក លោកស្រី ដែលជាអនុប្រធាន សមាជិកក្រុមការងារ និងមន្រ្តីរាជការពាក់ព័ន្ធ។ កិច្ចប្រជុំនេះរៀបចំឡើងដោយផ្តោតលើរបៀបវារៈចំនួន ៣ រួមមាន៖ (ទី១)-ប្រកាសសមាសភាព ក.កគវស.សកដ. (ទី២)-បទបង្ហាញស្តីពីផែនការសកម្មភាពកែទម្រង់ប្រព័ន្ធគ្រប់គ្រងការវិនិយោគសាធារណៈរបស់ក្រសួងសាធារណការ និងដឹកជញ្ជូន និង (ទី៣)-ការងារផ្សេងៗ។ ក្នុងកិច្ចប្រជុំ លោកជំទាវរដ្ឋលេខាធិការប្រចាំការ និងជាប្រធានក្រុមការងារ បានគូសបញ្ជាក់ពីសាវតា និងយន្តការនៃការរៀបចំប្រព័ន្ធគ្រប់គ្រងការវិនិយោគសាធារណៈ និងបានស្នើឱ្យក្រុមការងារទាំងអស់ ដែលជាថ្នាក់ដឹកនាំមកពីគ្រប់អង្គភាព និងមន្រ្តីរាជការក្រោមឱវាទក្រសួង ត្រូវចូលរួមសហការឱ្យបានជិតស្និទ្ធ ដើម្បីជំរុញសម្រេចឱ្យបាននូវផែនការសកម្មភាពដែលបានដាក់ចេញឱ្យបានទាន់ពេលវេលា ប្រកបដោយប្រសិទ្ធភាពខ្ពស់ និងត្រូវចូលរួមផ្តល់ធាតុចូលបន្ថែមពាក់ព័ន្ធក្នុងដែនសមត្ថកិច្ចទទួលបន្ទុក ដើម្បីជំរុញការកែទម្រង់ប្រព័ន្ធគ្រប់គ្រងការវិនិយោគសាធារណៈរបស់ក្រសួងសាធារណការ និងដឹកជញ្ជូន ឱ្យសម្រេចបានជោគជ័យ រួមចំណែកជាមួយរាជរដ្ឋាភិបាលក្នុងការដាក់ចេញនូវយុទ្ធសាស្ត្រស្តីពីការកែទម្រង់ប្រព័ន្ធគ្រប់គ្រង ការវិនិយោគសាធារណៈ (PIMSRS) ២០២៥-២០២៨ និងផែនការសកម្មភាពលម្អិត នាពេលខាងមុខនេះ៕