កាលពីថ្ងៃទី២៣ ខែសីហា ឆ្នាំ២០២៥ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំមន្រ្ដីបច្ចេកទេសក្រសួង និងមន្ទីរអភិវឌ្ឍន៍ជនបទខេត្តបាត់ដំបង ចុះទៅពិនិត្យវឌ្ឍនភាពនៃការសាងសង់ផ្លូវជនបទចំនួន ៣ខ្សែ នៅក្នុងស្រុកឯកភ្នំ ខេត្តបាត់ដំបង។– ខ្សែទី១ (តាពុន-ទួលអំពិល) មានប្រវែងសរុប ៦,១៨គ.ម. ទទឹងប្រវែង ៦ម៉ែត្រ ចិញ្ចើមសង្ខាងម្ខាងៗប្រវែង ១ ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ៥,៩៣ គ.ម និងក្រាលបេតុង (RC) ០,២៥ គ.ម មានលូប្រអប់ចំនួន ២ កន្លែង លូមូលចំនួន ១០ កន្លែង តភ្ជាប់ពីភូមិតាកុក ឃុំសំរោងក្នុង ទៅដល់ភូមិព្រែកខ្ទប់ ឃុំព្រែកហ្លួង ស្រុកឯកភ្នំ ខេត្តបាត់ដំបង វឌ្ឍនភាពសម្រេចលទ្ធផលបាន ១០០%។ ខ្សែផ្លូវនេះ មានអ្នកទទួលផលដោយផ្ទាល់ចំនួន ៦ ៤២២ គ្រួសារ ស្មើនឹង ២២ ៦០២ នាក់ និងដោយប្រយោលចំនួន ២ ៧៣២ គ្រួសារ ស្មើនឹង ១២ ៩១២នាក់ ។ – ខ្សែទី២ (អូរស្តី-អូរកំបុត) ប្រវែងសរុប ២,០៥ គ.ម. ទទឹងប្រវែង ៦ ម៉ែត្រ ចិញ្ចើមសង្ខាងម្ខាងៗប្រវែង ១ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ១,៤០ គ.ម និងក្រាលបេតុង (RC) ០,៦៥ គ.ម មានលូប្រអប់ចំនួន ២ កន្លែង តភ្ជាប់ពីភូមិព្រែកហ្លួង ឃុំព្រែកនរិន្ទ ទៅដល់ភូមិស្ពឺលើ ឃុំព្រែកហ្លួង ស្រុកឯកភ្នំ ខេត្តបាត់ដំបង វឌ្ឍនភាពសម្រេចលទ្ធផលបាន ៩១,០២%។ ខ្សែផ្លូវនេះ មានអ្នកទទួលផលផ្ទាល់ចំនួន ១ ០៧០ គ្រួសារ ស្មើនឹង ៥ ១៣៨នាក់ និងដោយប្រយោលចំនួន ១ ២២៦ គ្រួសារ ស្មើនឹង ៣ ៩៥៦នាក់។– ខ្សែទី៣ (តាគម-ព្រែកនរិន្ទ) មានប្រវែងសរុប ១០,២៤ គ.ម. ទទឹងប្រវែង ៦ ម៉ែត្រ ចិញ្ចើមសង្ខាងម្ខាងៗប្រវែង ១ ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ៩,០៩គ.ម និងក្រាលបេតុង (RC) ១,១៥គ.ម មានលូប្រអប់ចំនួន ៥ កន្លែង លូមូលចំនួន ១៣ កន្លែង តភ្ជាប់ពីភូមិព្រែកឆ្តោ ឃុំពាមឯក ទៅដល់ភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង វឌ្ឍនភាពសម្រេចលទ្ធផលបាន ៨៥,២១% ។ ខ្សែផ្លូវនេះ មានអ្នកទទួលផលផ្ទាល់ចំនួន ៣ ០៣៤គ្រួសារ ស្មើនឹង ១៣ ៧០៤នាក់ និងដោយប្រយោលចំនួន ៤ ៣៦០គ្រួសារ ស្មើនឹង ២៥ ៨៦១នាក់ ។ ខ្សែផ្លូវទាំង ៣ ខ្សែនេះស្ថិតក្នុងក្របខ័ណ្ឌគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) ដែលជាកិច្ចសហប្រតិបត្តិការរវាងរាជរដ្ឋាភិបាលកម្ពុជា មូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) ធនាគារវិនិយោគអឺរ៉ុប (EIB) និងមូលនិធិវិនិយោគអាស៊ី នៃសហភាពអឺរ៉ុប (EU-AIF) ដែលបាននិងកំពុងបម្រើផលប្រយោជន៍ដល់ប្រជាពលរដ្ឋដោយផ្ទាល់សរុបចំនួន ១០ ៥២៦ គ្រួសារ ស្មើនឹង ៤១ ៤៤៤នាក់ និងដោយប្រយោលចំនួន ៨ ៣១៨គ្រួសារ ស្មើនឹង ៤២ ៧២៩នាក់។ក្នុងឱកាសនោះ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានណែនាំដល់មន្ត្រីបច្ចេកទេសថ្នាក់ក្រសួង និងថ្នាក់មន្ទីរ ឱ្យខិតខំយកចិត្តទុកដាក់ក្នុងការត្រួតពិនិត្យបទដ្ឋានបច្ចេកទេស ដើម្បីធានាផ្លូវមានគុណភាពសម្រាប់ការប្រើប្រាស់យូរអង្វែង ព្រមទាំងការការពារសុវត្ថិភាពដល់ការធ្វើដំណើរផងដែរ។ តាមរយៈផ្លូវថ្មីស្ថាបនាជាកៅស៊ូនេះ នឹងផ្តល់ភាពងាយស្រួលសម្រាប់ការធ្វើដំណើរ ការដឹកជញ្ជូន និងការប្រកបមុខរបបផ្សេងៗ ដែលផ្ទុយពីអតីតកាលផ្លូវមានសភាពលំបាកដោយសារជង្ហុកធំៗ រអិល និងហុយ ដែលបណ្ដាលឱ្យមានគ្រោះថ្នាក់ជាញឹកញាប់ និងប៉ះពាល់ដល់សុខភាពរបស់ប្រជាពលរដ្ឋផងដែរ។ បន្ទាប់មកលោករដ្ឋមន្ត្រី និងប្រតិភូរួមដំណើរ បានចុះទៅពិនិត្យស្ថានភាពផ្លូវមួយខ្សែទៀតមានប្រវែង ៩,២០គ.ម. តភ្ជាប់ពីភូមិកគរ ឃុំអូតាគី ស្រុកថ្មគោល ទៅកាន់ភូមិតាគម ឃុំពាមឯក ស្រុកឯកភ្នំ ខេត្តបាត់ដំបង។ ផ្លូវ១ខ្សែនេះ ត្រូវបានសាងសង់ក្នុងឆ្នាំ២០១៧ ក្នុងក្របខ័ណ្ឌកម្មវិធីកែលម្អហេដ្ឋារចនាសម្ព័ន្ធជនបទជំហានទី៤ (RIP4)។ ដោយសារស្ថានភាពផ្លូវមានសភាពខូចខាតច្រើន លោករដ្ឋមន្ត្រី ក៏បានណែនាំដល់មន្ត្រីបច្ចេកទេសក្រសួង និងមន្ទីរពិនិត្យលទ្ធភាពដាក់ខ្សែផ្លូវនេះ ក្នុងគម្រោងស្ដារឡើងវិញផ្លូវជនបទរបស់ក្រសួងនាឆ្នាំបន្ទាប់ ដើម្បីលើកកម្ពស់សក្ដានុពលទេសចរណ៍ និងសេដ្ឋកិច្ចក្នុងតំបន់ឱ្យកាន់តែប្រសើរឡើងនាពេលអនាគត៕