កិច្ចប្រជុំជាមួយប្រតិភូក្រុមការងារទីប្រឹក្សាបច្ចេកទេសហេដ្ឋារចនាសម្ព័ន្ធទីប្រជុំជននៃធនាគារពិភពលោក(World Bank) លើការងារផ្ទេរមុខងារ និងហិរញ្ញវត្ថុ ទៅថ្នាក់ក្រោមជាតិលើវិស័យហេដ្ឋារចនាសម្ព័ន្ធ ក្នុងកំណែទម្រង់វិមជ្ឈការ និងវិសហមជ្ឈការ នៃក្រសួងសាធារណការ និងដឹកជញ្ជូន ទីស្តីការក្រសួង៖ នាថ្ងៃពុធ ទី២០ ខែសីហា ឆ្នាំ២០២៥ ឯកឧត្តម ស៊ឹង សុគង់ អនុរដ្ឋលេខាធិការ និងជាប្រធានលេខាធិការដ្ឋាននៃគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការក្រសួងសាធារណការ និងដឹកជញ្ជូន បានដឹកនាំក្រុមការងារលេខាធិការដ្ឋាន ជួបប្រជុំជាមួយក្រុមការងារទីប្រឹក្សាបច្ចេកទេសហេដ្ឋារចនាសម្ព័ន្ធទីប្រជុំជននៃធនាគារពិភពលោក(World Bank) ដោយមានការអញ្ជើញចូលរួមពីតំណាងអគ្គនាយកដ្ឋានសាធារណការ ប្រព័ន្ធចម្រោះទឹកកខ្វក់ ផ្លូវគោក ផ្លូវទឹក ផ្លូវសមុទ្រ និងកំពង់ផែ និងមន្រ្តីជំនាញពាក់ព័ន្ធក្រោមឱវាទក្រសួងផងដែរ។ កិច្ចប្រជុំនេះរៀបចំឡើងតាមសំណើររបស់ធនាគារពិភពលោក ប្រចាំកម្ពុជា ក្នុងគោលបំណងដើម្បីពិភាក្សា និងឈ្វេងយល់លើការងារការអនុវត្តមុខងារដែលបានផ្ទេរពីក្រសួងសាធារណការ និងដឹកជញ្ជូន ពាក់ព័ន្ធហេដ្ឋារចនាសម្ព័ន្អផ្លូវថ្នល់ ប្រព័ន្ធទឹកកខ្វក់ ការគ្រប់គ្រងគ្រោះមហន្តរាយ និងការវិនិយោគឯកជន ដែលបានផ្ទេរទៅរដ្ឋបាលថ្នាក់ក្រោមជាតិ ក្នុងក្របខណ្ឌកំណែទម្រង់វិមជ្ឈការ និងវិសហមជ្ឈការ។ បន្ទាប់ពីបានស្តាប់របាយការណ៍វឌ្ឍនភាពពាក់ព័ន្ធការងារផ្ទេរមុខងារ ក្រុមការងារទីប្រឹក្សាបច្ចេកទេសហេដ្ឋារចនាសម្ព័ន្ធទីប្រជុំជន នៃធនាគារពិភពលោក បានវាយតម្លៃខ្ពស់ចំពោះកិច្ចខិតខំប្រឹងប្រែង គោលនយោបាយតាមរយៈកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ ដំណាក់កាលទី១ (២០១១-២០២០) និងទី២(២០២១-២០៣០) របស់ក្រសួងសាធារណការ និងដឹកជញ្ជូន ដែលបានអនុវត្តការផ្ទេរមុខងារ និងបានរៀបចំសេចក្តីណែនាំ និងបទដ្ឋានបច្ចេកទេស និងបណ្តុះបណ្តាល ជូនទៅថ្នាក់ក្រោមជាតិបានយ៉ាងល្អប្រសើរ។ ទោះយ៉ាងណាក៏នៅមានបញ្ហាប្រឈមមួយចំនួនទាំងថ្នាក់ជាតិ និងថ្នាក់ក្រោមជាតិ ដែលបាន និងកំពុងបន្តរួមគ្នាដោះស្រាយ ដើម្បីឱ្យដំណើរការអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ សម្រេចបានជោគជ័យតាមការគ្រោងទុក៕