ក្រុមហ៊ុន រ៉ូយ៉ាល់ រេលវេ នៅរសៀលថ្ងៃទី ២៥ ខែកក្កដា ឆ្នាំ ២០២៥ បានចុះហត្ថលេខាកិច្ចព្រមព្រៀងប្រតិបត្តិការ និងថែទាំបណ្តោះអាសន្នលើគម្រោងផ្លូវដែកកម្ពុជា ជាមួយក្រសួងសាធារណការ និងដឹកជញ្ជូន។កិច្ចព្រមព្រៀងគោលការណ៍នេះជាគោលជំហានសំខាន់ក្នុងការពង្រឹងហេដ្ឋារចនាសម្ព័ន្ធផ្លូវរថភ្លើងនៃកម្ពុជា ដើម្បីធានាបាននូវដំណោះស្រាយដឹកជញ្ជូនដ៏ប្រសើរ និងគ្រប់គ្រងបានយូរអង្វែងសម្រាប់អនាគត។ ក្រុមហ៊ុន រ៉ូយ៉ាល់ រេលវេ នឹងនៅតែបន្តខិតខំក្នុងការផ្តល់សេវាកម្មផ្លូវរថភ្លើងដ៏មានសុវត្ថិភាព គួរឱ្យទុកចិត្ត និងមានប្រសិទ្ធភាពជូនដល់អាជីវកម្មនានាទូទាំងប្រទេស។កិច្ចសហប្រតិបត្តិការជាមួយក្រសួងសាធារណការ បង្ហាញពីការប្តេជ្ញាចិត្តរបស់ក្រុមហ៊ុនក្នុងការគាំទ្រគោលដៅអភិវឌ្ឍន៍រយៈពេលវែងរបស់កម្ពុជា។លោក ប៉ែង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា ការចុះកិច្ចព្រមព្រៀងនេះ ធ្វើឡើងក្នុងគោលបំណងធានាថា ប្រតិបត្តិការផ្លូវដែកនៅតែបន្តដោយគ្មានការរំខានក្នុងអំឡុងពេលអន្តរកាល នៃកិច្ចចរចាកិច្ចព្រមព្រៀង PPP ថ្មី រវាងរាជរដ្ឋាភិបាល ក្រុមហ៊ុន រ៉ូយ៉ាល់ រេលវេ និងក្រុមហ៊ុនដៃគូយុទ្ធសាស្ត្រ ជាពិសេសធានាឱ្យបាននូវការធ្វើឱ្យប្រសើរឡើងសេវាផ្លូវដែកនានា ទាំងការដឹកជញ្ជូនមនុស្ស និងទំនិញ, ការបង្កើតឱ្យមាននូវវិធានការសុវត្ថិភាពខ្ពស់បំផុត មួយនៅតាមបណ្តាញផ្លូវដែកទាំងពីរខ្សែ និងការអនុវត្តយ៉ាងម៉ឺងម៉ាត់ ស្របតាមការណែនាំ របស់រាជរដ្ឋាភិបាល ក្នុងករណីចាំបាច់ណាមួយ។ កិច្ចព្រមព្រៀងប្រតិបត្តិការ និងថែទាំបណ្តោះ អាសន្ននេះ ក៏បានកំណត់អំពីសូចនាករសមិទ្ធកម្មគន្លឹះ ថ្មីមួយចំនួនផងដែរ ដើម្បីជំរុញការធ្វើប្រតិបត្តិការ និងការថែទាំផ្លូវដែក ដោយអនុលោមតាមស្តង់ដារ និងឧត្តមានុវត្តន៍អន្តរជាតិ៕