(ព្រះវិហារ)៖ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ នៅថ្ងៃទី២៦ ខែកក្កដា ឆ្នាំ២០២៥នេះ បាននាំតង់កៅស៊ូចំនួន១០០តង់ ទំហំ៥ម៉ែត្រ គុណ៧ម៉ែត្រ អំណោយរបស់លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ប្រគល់ជូនរដ្ឋបាលខេត្តព្រះវិហារ សម្រាប់ប្រើប្រាស់ចែកជូនប្រជាពលរដ្ឋភៀសសឹក នៅវត្តពោធិ៍៥០០០ដើម នៅស្រុកគូលែន។ លោក សំ លាងទ្រី បានថ្លែងថា តង់កៅស៊ទាំងនេះនឹងក្លាយជា ជម្រកដ៏សំខាន់សម្រាប់ប្រជាពលរដ្ឋដែលបានភៀសខ្លួនពីការឈ្លានពានរបស់ខ្មាំងសៀម នៅក្នុងស្រុកជាំក្សាន្ត និងកំពុងស្នាក់នៅតំបន់សុវត្ថិភាពវត្តពោធិ៍៥០០០ដើម ស្រុកគូលែន ខេត្តព្រះវិហារ។ លោកបានបញ្ជាក់ថា ការឧបត្ថម្ភតង់កៅស៊ូនេះ បានឆ្លុះបញ្ចាំងពីទឹកចិត្តសប្បុរសធម៌ និងការយកចិត្តទុកដាក់ខ្ពស់របស់លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ចំពោះសុខទុក្ខរបស់ប្រជាពលរដ្ឋខេត្តព្រះវិហារ។ លោកសូមបួងសួងជូនពរលោករដ្ឋមន្ត្រី និងក្រុមគ្រួសារ ទទួលបាននូវពរជ័យគ្រប់ប្រការ កម្លាំងពលាំងមាំមួន និងសម្រេចបានជោគជ័យគ្រប់ភារកិច្ច៕