ភ្នំពេញ៖ យុទ្ធនាការ «ផ្លូវជាតិគ្មានសំរាម និងសំណល់ប្លាស្ទិក» សម្រេចបាន ៩៤,១២ ភាគ រយ ក្នុងឆមាសទី១ ឆ្នាំ២០២៥។ ក្រសួងបរិស្ថាន មានសុទិដ្ឋិនិយមថា ផ្លូវជាតិទាំងអស់ នឹង ទទួលបានភាពស្អាតនៅចុងឆ្នាំ២០២៥ ស្របពេលផ្លូវជាតិប្រមាណ ៧៥ភាគរយ ឬស្មើ ៤ ៧២៥ គីឡូម៉ែត្រ មានសភាពស្អាតល្អ។លោក ខ្វៃ អាទិត្យា អ្នកនាំពាក្យក្រសួងបរិស្ថាន បានបញ្ជាក់ប្រាប់អ្នកសារព័ត៌មាន នៅថ្ងៃទី ២០ ខែកក្កដាថា រយៈពេល៦ខែ ឆ្នាំ២០២៥នេះ យុទ្ធនាការ «ផ្លូវជាតិគ្មានសំរាម និងសំណល់ប្លាស្ទិក» សម្រេចបានការសម្អាតផ្លូវជាតិ ៦៤ខ្សែ ឬស្មើ ៩៤,១២ភាគរយ នៃចំនួន ផ្លូវជាតិគោលដៅសរុបទូទាំងប្រទេស ដែលមានចំនួន ៦៨ខ្សែ និងមានប្រវែង ៦ ៣៤៩ គីឡូម៉ែត្រ។ ក្នុងរយៈពេលដដែលនេះ ផ្លូវជាតិប្រវែង ៦ ២០៥,៦៧ គីឡូម៉ែត្រ ឬស្មើនឹង៩៧,៧៤ ភាគ រយ ត្រូវបានសម្អាតរួចរាល់ដោយបានប្រមូលទុកដាក់សំរាម និងសំណល់ប្លាស្ទិក ជាប់ជា ប្រចាំ។ ការងារនេះ មានការចូលរួមពីមន្ទីរបរិស្ថានរាជធានី ខេត្ត សហការជាមួយ រដ្ឋបាល ថ្នាក់ក្រោមជាតិ អាជ្ញាធរមូលដ្ឋានគ្រប់ថ្នាក់ អង្គការសង្គមស៊ីវិល សមាគម ដៃគូសហការ ផ្នែកឯកជន និងពលរដ្ឋតាមមូលដ្ឋាន។ ចំពោះ ឃុំសង្កាត់ដែលជាប់ផ្លូវជាតិមានចំនួន ៩៥០ ឃុំ/សង្កាត់ ក្នុងនោះឃុំ/សង្កាត់ចំនួន ៨៩៥ បានចូលរួមក្នុងយុទ្ធនាការ «ផ្លូវជាតិគ្មានសំរាម និងសំណល់ប្លាស្ទិក» មានអ្នកចូលរួមសរុប ២៦៣ ៥៥២នាក់ ព្រមទាំងបានប្រមូលទុកដាក់សំណល់សរុបជាង ៣៤៥តោន។ បើតាម លោក ខ្វៃ អាទិត្យា ផ្លូវជាតិដែលនៅសេសសល់ មិនទាន់បានសម្អាត ដោយសារមូលហេតុផ្លូវកំពុងជួសជុល។ យ៉ាងណាក៏ដោយ ក្រសួងបរិស្ថាន មានសុទិដ្ឋិនិយម ថា ផ្លូវជាតិទាំងអស់នៅកម្ពុជា នឹងទទួលបានភាពស្អាត នៅចុងឆ្នាំ២០២៥។ ក្រសួងបរិស្ថាន បានប្រកាសបើកយុទ្ធនាការសម្អាតផ្លូវជាតិ ក្រោមប្រធានបទ «ផ្លូវជាតិគ្មានសំរាមប្លាស្ទិក» កាលពីថ្ងៃទី១ ខែមករា ឆ្នាំ២០២៥។ ក្នុងពេលប្រកាសបើកយុទ្ធនាការនេះ លោក អ៊ាង សុផល្លែត រដ្ឋមន្រ្តីក្រសួងបរិស្ថាន បានលើកឡើងថា យុទ្ធនាការសម្អាតផ្លូវជាតិនេះ នឹងចូលរួមចំណែកលើកកម្ពស់សោភ័ណភាពទីក្រុង ទីប្រជុំជននៅតាមបណ្តាផ្លូវជាតិទូទាំងប្រទេស ឱ្យកាន់តែស្រស់ស្អាត មានអនាម័យ ខ្យល់អាកាសស្អាត និងសណ្តាប់ធ្នាប់ល្អ ប្រកបដោយផាសុកភាព។ សម្រាប់រដ្ឋមន្ត្រីក្រសួងបរិស្ថាន ផ្លូវស្អាត នឹងជួយទាក់ទាញអ្នកវិនិយោគ និងទេសចរមកកម្សាន្តប្រទេសកម្ពុជាកាន់តែច្រើន។ ដូច្នេះ លោករដ្ឋមន្ត្រី ក៏ស្នើដល់វិស័យសាធារណៈ និងឯកជន រដ្ឋបាលរាជធានី-ខេត្តគ្រប់លំដាប់ថ្នាក់ គ្រូបង្រៀន សិស្សានុសិស្ស និងពលរដ្ឋ រួមគ្នាបង្កើតសកម្មភាពចុះសម្អាតផ្លូវជាតិនៅតាមមូលដ្ឋានរៀងៗខ្លួន ដើម្បី«ផ្លូវជាតិ»នៅកម្ពុជាស្អាត។ សូមជម្រាបថា បច្ចុប្បន្ន ក្នុងមួយថ្ងៃ កម្ពុជាបានបង្កើតសំរាមជាង១ម៉ឺនតោន ឬស្មើនឹងជិត ៤លានតោនក្នុងមួយឆ្នាំ។ ដោយឡែកនៅរាជធានីភ្នំពេញ មានសំរាមចន្លោះពី ៣ទៅ៥ពាន់តោនក្នុងមួយថ្ងៃ ក្នុងនោះសំណល់ម្ហូបអាហារប្រមាណ៦០ភាគរយ និងថង់ប្លាស្ទិកប្រមាណ២០ភាគរយ។ ក្រៅពីនេះជាសំណល់ផ្សេងៗ ដូចជាកៅស៊ូ ក្រដាស កំណាត់ឈើជាដើម៕