កិច្ចប្រជុំក្រុមប្រឹក្សាភិបាល នៃមន្ទីរពិសោធន៍សំណង់ និងសាធារណការ អាណត្តិទី៦ លើកទី៦ ទីស្តីការក្រសួង៖ នាថ្ងៃអង្គារ ទី២២ ខែកក្កដា ឆ្នាំ២០២៥នេះ លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងជាប្រធានក្រុមប្រឹក្សាភិបាល មន្ទីរពិសោធន៍សំណង់ និងសាធារណការ បានអញ្ជើញដឹកនាំកិច្ចប្រជុំក្រុមប្រឹក្សាភិបាល នៃមន្ទីរពិសោធន៍សំណង់ និងសាធារណការ អាណត្តិទី៦ លើកទី៦ ដោយមានការចូលរួមពីសមាជិកក្រុមប្រឹក្សាភិបាល ដែលជាតំណាងមកពីក្រសួងស្ថាប័នពាក់ព័ន្ធ។ កិច្ចប្រជុំនេះត្រូវបានធ្វើឡើងដើម្បីពិនិត្យ និងអនុម័តលើរបាយការណ៍អនុវត្តការងារអាជីវកម្ម-សេវាកម្ម និងការងារវិនិយោគប្រចាំឆ្នាំ២០២៤ ការងារវិនិយោគត្រីមាសទី១ ឆ្នាំ២០២៥ និងពិនិត្យ អនុម័តលើរបាយការណ៍អនុវត្តការងារអាជីវកម្ម-សេវាកម្ម និងការងារវិនិយោគឆមាសទី១ ឆ្នាំ២០២៥ របស់មន្ទីរពិសោធន៍សំណង់ និងសាធារណការ (មពសស)។ បន្ទាប់ពីបានពិនិត្យ និងពិភាក្សាយ៉ាងផុសផុល អង្គប្រជុំក្រុមប្រឹក្សាភិបាល មពសស បានអនុម័តទាំងស្រុងលើរបាយការណ៍អនុវត្តន៍ការងារអាជីវកម្ម-សេវាកម្ម និងការងារវិនិយោគប្រចាំឆ្នាំ២០២៤ របាយការណ៍អនុវត្តការងារអាជីវកម្ម-សេវាកម្ម និងការងារវិនិយោគត្រីមាសទី១ ឆ្នាំ២០២៥ និងរបាយការណ៍អនុវត្តការងារអាជីវកម្ម-សេវាកម្ម និងការងារវិនិយោគឆមាសទី១ ឆ្នាំ២០២៥របស់មន្ទីរពិសោធន៍សំណង់ និងសាធារណការ (មពសស) ។ ទន្ទឹមនឹងនេះដែរ មន្ទីរពិសោធន៍សំណង់ និងសាធារណការ (មពសស) បានគោរពនូវរាល់គោលការណ៍ និងកាតព្វកិច្ចជាសហគ្រាសសាធារណៈ ដោយបានប្រមូលពន្ធអាករលើតម្លៃបន្ថែម (VAT) ពីអតិថិជន និងពន្ធអាករផ្សេងៗ ជាច្រើនទៀតបង់ចូលថវិការដ្ឋយ៉ាងត្រឹមត្រូវ៕