អាជ្ញាធរអគ្គិសនីកម្ពុជា បានចេញសេចក្ដីសម្រេចកំណត់តម្លៃបញ្ចូលថាមពលយានយន្ដអគ្គិសនី ឱ្យអ្នកកាន់អាជ្ញាបណ្ណធ្វើសេវាកម្មបញ្ចូលថាមពលយានយន្ដអគ្គិសនីយកទៅអនុវត្ដ។ នេះបើតាមសេចក្ដីសម្រេចចេញនៅថ្ងៃទី៧ ខែកក្កដា ឆ្នាំ២០២៥។ ចំពោះការកំណត់តម្លៃបញ្ចូលថាមពលមានដូចជា៖ ១. ការបញ្ចូលថាមពលតាមចរន្ដឆ្លាស់(AC) ថ្លៃ១,០៥០រៀល/KWh, ២. ការបញ្ចូលថាមពលតាមចរន្ដជាប់(DC) ថ្លៃ១,៣៥០រៀល/KWh។ ចំពោះតម្លៃដែលបានកំណត់នេះគឺជាបញ្ជីថ្លៃអតិបរមា អ្នកកាន់អាជ្ញាបណ្ណអាចអនុវត្ដអត្រាថ្លៃបញ្ចូលថាមពលទាបជាងកម្រិតថ្លៃអតិបរមាបាន។ សេចក្ដីសម្រេចត្រូវចូលជាធរមានចាប់ពីថ្ងៃចុះហត្ថលេខារហូតដល់មានការកែសម្រួលឡើងវិញដោយអាជ្ញាធរអគ្គិសនីកម្ពុជា៕