កិច្ចប្រជុំពិភាក្សាលើសំណើសុំការពិនិត្យសម្រេចលើគោលការណ៍កំណត់អត្រានៃកម្រៃសេវាទឹកកខ្វក់បញ្ចូលរួមជាមួយវិក្កយបត្រទឹកស្អាត ទីស្ដីការក្រសួងសេដ្ឋកិច្ច និងហិរញ្ញវត្ថុ៖ នាព្រឹកថ្ងៃចន្ទ ទី៧ ខែកក្កដា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចូលរួមកិច្ចប្រជុំពិភាក្សាលើសំណើសុំការពិនិត្យសម្រេចលើគោលការណ៍កំណត់អត្រានៃកម្រៃសេវាទឹកកខ្វក់បញ្ចូលជាមួយវិក្កយបត្ររួមទឹកស្អាត ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ រួមជាមួយនឹងថ្នាក់ដឹកនាំ និងមន្ត្រីជំនាញ នៃក្រសួងសេដ្ឋកិច្ច និងហិរញ្ញវត្ថុផងដែរ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យលើការស្នើសុំការពិនិត្យសម្រេចលើគោលការណ៍កំណត់អត្រានៃកម្រៃសេវាទឹកកខ្វក់បញ្ជូលតរួមជាមួយវិក័យបត្រទឹកស្អាត ក្នុងការធានាឱ្យបាននូវភាពគ្រប់ជ្រុងជ្រោយ និងប្រទាក់ក្រឡា អនុលោមភាពជាមួយនឹងវិធាននៃច្បាប់ស្ដីពីប្រព័ន្ធទឹកកខ្វក់ មុននឹងផ្ដល់ការសម្រេចលើគោលការណ៍កំណត់អត្រានៃកម្រៃសេវាទឹកកខ្វក់៕