កិច្ចប្រជុំឧត្តមមន្ត្រី នៃវេទិកាវិស័យដឹកជញ្ជូនប្រកបដោយនិរន្តភាពសកល (The Senior Official’s Meeting of The Global Sustainable Transport Forum) ប្រទេសចិន៖ ចាប់ពីថ្ងៃទី៣០ ខែមិថុនា ដល់ថ្ងៃទី១ ខែកក្កដា ឆ្នាំ២០២៥ លោក គង់ សុផល អគ្គនាយករង នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន បានដឹកនាំគណៈប្រតិភូកម្ពុជាចូលរួមកិច្ចប្រជុំឧត្តមមន្ត្រី នៃវេទិកាវិស័យដឹកជញ្ជូនប្រកបដោយនិរន្តភាពសកល (The Senior Official’s Meeting of The Global Sustainable Transport Forum) ដោយមានគណៈប្រតិភូចំនួន ២០ប្រទេសចូលរួម និងក្រោមអធិបតីភាពបើកកម្មវិធីដោយ ឯកឧត្តម លី យ៉ាង អនុរដ្ឋមន្ត្រី ក្រសួងដឹកជញ្ជូន នៃប្រទេសចិន។ កិច្ចប្រជុំនេះ រៀបចំឡើងក្នុងគោលបំណងជំរុញការអភិវឌ្ឍ និងកិច្ចសហប្រតិបត្តិការដឹកជញ្ជូនប្រកបដោយនិរន្តរភាពជាសកលក្នុងវិស័យមួយចំនួនដូចជា៖ ការអភិវឌ្ឍហេដ្ឋារចនាសម្ព័ន្ធ ការសម្របសម្រួលការដឹកជញ្ជូន និងការសហការលើវិទ្យាសាស្ត្រ បច្ចេកវិទ្យា និងនវានុវត្តន៍ ស្របតាមទិសដៅយុទ្ធសាស្ត្រ របស់អង្គការសហប្រជាជាតិ និងដើម្បីជំរុញលំហូរពាណិជ្ជកម្ម និងធនធានតាមរយៈការអភិវឌ្ឍការដឹកជញ្ជូនប្រកបដោយនិរន្តភាព ជំរុញកំណើនសេដ្ឋកិច្ចប្រកបដោយស្ថិរភាព និងជំរុញការសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs) របស់អង្គការសហប្រជាជាតិ និងគំនិតផ្តួចផ្តើមអភិវឌ្ឍន៍សកល។ គួរជម្រាបជូនថា កិច្ចប្រជុំនេះ នឹងពិភាក្សាលើប្រធានបទ ៣ សំខាន់ៗ រួមមាន: ១). សេចក្តីព្រាងកិច្ចព្រមព្រៀងក្របខ័ណ្ឌ ស្តីពីកិច្ចសហប្រតិបត្តិការ និងការអភិវឌ្ឍលើវិស័យដឹកជញ្ជូនប្រកបដោយនិរន្តភាពសកល ២). ការផលិតរបាយការណ៍ស្រាវជ្រាវ ស្តីពីការដឹកជញ្ជូនប្រកបដោយនិរន្តភាពសកល និងការកំណត់សូចនាករដឹកជញ្ជូនប្រកបដោយនិរន្តភាព (Sustainable Transport Index) និង ៣). ការប្រមូលផ្តុំការអនុវត្តដែលមានប្រសិទ្ធភាពពាក់ព័ន្ធនឹងការដឹកជញ្ជូនប្រកបដោយនិរន្តភាពសកល សម្រាប់ជាគំរូដល់បណ្តាប្រទេសនានាអនុវត្ត៕