ជំនួបពិភាក្សាការងាររវាងវិទ្យាស្ថានតេជោសែន សាធារណការ និងដឹកជញ្ជូន ជាមួយក្រុមការងារក្រុមហ៊ុន Cambodian PPSHV Expressway លើកិច្ចសហប្រតិបត្ដិការកសាងធនធានមនុស្ស សម្រាប់បម្រើដល់ការងារផ្លូវល្បឿនលឿន ទីស្ដីការក្រសួង ៖ នាថ្ងៃចន្ទ ទី៣០ ខែមិថុនា ឆ្នាំ២០២៥ ឯកឧត្ដម ប្រាងហង្ស សេរីរិទ្ធ នាយកវិទ្យាស្ថាន បានទទួលជួបពិភាក្សាការងារជាមួយលោក លី ខាយចាន់ នាយករងផ្នែកធនធានមនុស្ស នៃក្រុមហ៊ុន Cambodian PPSHV Expresswa ដើម្បីពិនិត្យលទ្ធភាពលើកិច្ចសហប្រតិបត្តិការ ក្នុងការកសាងធនធានមនុស្សសម្រាប់បម្រើដល់ការងារផ្លូវល្បឿនលឿន ដោយមានការចូលរួមពីសំណាក់ថ្នាក់ដឹកនាំនាយកដ្ឋាន ថ្នាក់ដឹកនាំការិយាល័យ និងសហការី នៃក្រុមហ៊ុន Cambodian PPSHV Expressway។ កិច្ចប្រជុំនេះ ត្រូវបានធ្វើឡើងក្នុងគោលបំណងដើម្បីពិនិត្យលទ្ធភាពក្នុងការសហការរៀបចំកម្មវិធីបណ្តុះបណ្តាលនានា ពាក់ព័ន្ធនឹងវិស័យសាធារណការ (ផ្នែកផ្លូវល្បឿនលឿន) និងពិនិត្យលទ្ធភាពក្នុងការស្វែងរកឱកាសកម្មសិក្សា និងឱកាសការងារដល់និស្សិតវិទ្យាស្ថាននាពេលអនាគតផងដែរ។ ថ្លែងនាឱកាសនោះ ក្រុមការងារក្រុមហ៊ុនផ្លូវល្បឿនលឿន បានលើកឡើង ពីផ្លូវល្បឿនលឿនទី១ (ភ្នំពេញ-ព្រះសីហនុ) ត្រូវបានសាងសង់រួចក៏ពិតមែន ក្រុមហ៊ុននៅមានតម្រូវការធនធានមនុស្ស ដើម្បីបម្រើដល់វិស័យនេះ ជាអាទិ៍ ការថែទាំ ការត្រួតពិនិត្យសុវត្ថិភាព និងការគ្រប់គ្រងផ្លូវជាដើម ស្របពេលដែលគម្រោងផ្លូវល្បឿនលឿនផ្សេងៗ ក៏នឹងលេចចេញជារូបរៀងនៅពេលអនាគត ដូច្នេះហើយកិច្ចការជាមួយវិទ្យាស្ថានតេជោសែន សាធារណការ និងដឹកជញ្ជូន គឺជាការចូលរួមចំណែកដល់យ៉ាងសំខាន់ក្នុងការអភិវឌ្ឍវិស័យនេះ ដោយសារវិទ្យាស្ថាន គឺជាគ្រឹះស្ថានឧត្ដមសិក្សា ក្រោមឱវាទក្រសួងសាធារណការ និងដឹកជញ្ជូន ដែលមានកម្មវិធីសិក្សាលើជំនាញផ្លូវល្បឿន និងជំនាញពាក់ព័ន្ធនានា៕