ផ្លូវ ១ ខ្សែ នៅភូមិទួលពង្រ សង្កាត់ចោមចៅទី ១ ខណ្ឌពោធិ៍សែនជ័យ ដែលទើបតែឈូសឆាយកាយបេតុងកាត់សំយាបពង្រីកផ្លូវ ថ្មីៗ នេះ ស្រាប់តែមានទឹកស្អុយហូរហៀរចេញពីលូដក់លើផ្លូវ ពិបាកក្នុងការប្រកបរបរប្រចាំថ្ងៃ ប្រជាពលរដ្ឋស្នើដល់អាជ្ញាធរជួយសម្រួលប្រព័ន្ធលូ។លោក អ៊ុយ គុម្ភៈ ជាជាងជួសជុល និងលក់ទូរស័ព្ទដៃ ក្បែរផ្លូវខាងលើ បានលើកឡើងថា កន្លងមក មុខតូបរបស់គាត់មិនដែលមានទឹកដក់នោះទេបើទោះបីជាភ្លៀង ត្រឹមតែរយៈពេល ១ ម៉ោងក្រោយ ក៏ហូរទៅអស់ដែរ តែពេលនេះ មេឃមិនភ្លៀងផង បែរជាមានទឹកស្អុយដក់ជាប់មុខតូប ធ្វើឲ្យលក់ដូរមិនដាច់ ភ្ញៀវឈប់ ឬដើរចូលមិនកើត។ លោក ទទូចស្នើអាជ្ញាធរ មេត្តាជួយសម្រួលដល់បញ្ហានេះផង។លោកបានបន្តថា ចំពោះបញ្ហាខាងលើនេះ លោកក៏បានសួរទៅ លោក ប៉ាង លីដា អភិបាលរងខណ្ឌពោធិ៍សែនជ័យតាមរយៈប្រព័ន្ធតេលេក្រាមដែរ តែមិនមានការឆ្លើយតបនោះទេ។ដោយឡែក លោក យ៉ាន់ ភារៈ ជាពលរដ្ឋរស់នៅតំបន់ខាងលើ ក៏បានលើកឡើងដែរថា រយៈពេល ៥ ថ្ងៃ មកហើយ ដែលមេឃភ្លៀង ហើយ ៥ ថ្ងៃក្រោយមកនេះ ទឹកស្អុយនៅតែបន្តហូរចេញពីប្រព័ន្ធលូជះក្លិនស្អុយពិបាកក្នុងការរស់នៅ។លោកថា ពលរដ្ឋគាំទ្រអាជ្ញាធរក្នុងការចុះឈូសឆាយកាយកាត់សំយាបដើម្បីពង្រីកផ្លូវឲ្យធំទូលាយ តែក៏សំណូមពរអាជ្ញាធរជួយសម្រួលដល់ប្រព័ន្ធលូផង៕