គម្រោងសាងសង់ ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចបានប្រមាណ ៣៣,៥០ % ហើយ គិតមកដល់ដើមខែឧសភា ឆ្នាំ២០២៥ នេះ! បន្ទាប់ពីត្រូវបាន បើកការដ្ឋានសាងសង់ កាលពីថ្ងៃទី ១៩ខែកុម្ភៈ ឆ្នាំ២០២៤ ទល់មកនឹងដើមខែឧសភាឆ្នាំ២០២៥ នេះ ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចការងារសាងសង់ បានប្រមាណ ៣៣,៥០ % ហើយ។ ក្នុងនោះដែរ ការងារសាងសង់ស្ពានផ្នែកខាងកើត សម្រេចបាន៖ - ១/ ផ្នែកគ្រឹះស្ពានសម្រេចបានប្រមាណ ៥៥% ក្នុងនោះបានចាក់បេតុង សសរគ្រឹះចំនួន ១០៧ដើម (ក្នុងចំណោម ១៥៦ដើម) សាងសង់ជើងតាងបាន ៦ជើងតាង (ក្នុងចំណោម ២០ជើងតាង) និងធ្នឹមភ្ជាប់ក្រោមបានចំនួន ៨ធ្នឹម (ក្នុងចំណោម ១២ធ្នឹម)។ - ២/រចនាសម្ព័ន្ធក្រោមស្ពានសម្រេចបាន៣១,៥% រួមមានសាងសង់តួសរសរស្ពានបាន ៦តួសរសរ (ក្នុងចំណោម ១២តួសរសរ) សាងសង់សរសេរស្ពានបាន ១៦សរសរស្ពាន (ក្នុងចំណោម ៥២សរសេរស្ពាន) និងសាងសង់ធ្នឹមភ្ជាប់ក្បាលសរសរទទឹងស្ពានបាន ១០ធ្នឹម (ក្នុងចំណោម ៣៤ធ្នឹម) ព្រមទាំងការងារសំខាន់ៗ មួយចំនួនទៀត។ គូសសម្គាល់ផងថា គម្រោងនេះ មានផែនការសាងសង់សរុបរយៈពេល ៤២ខែ ដែលគិតត្រឹមខែកុម្ភៈ ឆ្នាំ២០២៥នេះ សម្រេចបាន ១៣ខែហើយ ស្មើនឹង ៣១% ដោយមិនមានការយឺតយ៉ាវ ជាងកម្មវិធីការងារដែលគ្រោងទុកនោះទេ។