ក្រុងតាខ្មៅ ខេត្តកណ្តាល៖ ពិធីបើកការដ្ឋានគម្រោងអភិវឌ្ឍន៍ប្រព័ន្ធចម្រោះទឹកកខ្វក់ក្រុងតាខ្មៅ ក្រោមអធិបតីភាពសម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៅព្រឹកថ្ងៃអង្គារ ទី៦ ខែឧសភា ឆ្នាំ២០២៥ ដែលមានតម្លៃជិត ១០០លានដុល្លារអាមេរិក ជាហិរញ្ញប្បទានតាមរយៈកម្ចីសម្បទានពីរដ្ឋាភិបាលនៃសាធារណរដ្ឋកូរ៉េ។ក្រុងតាខ្មៅ ខេត្តកណ្តាល៖ ពិធីបើកការដ្ឋានគម្រោងអភិវឌ្ឍន៍ប្រព័ន្ធចម្រោះទឹកកខ្វក់ក្រុងតាខ្មៅ ក្រោមអធិបតីភាពសម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៅព្រឹកថ្ងៃអង្គារ ទី៦ ខែឧសភា ឆ្នាំ២០២៥ ដែលមានតម្លៃជិត ១០០លានដុល្លារអាមេរិក ជាហិរញ្ញប្បទានតាមរយៈកម្ចីសម្បទានពីរដ្ឋាភិបាលនៃសាធារណរដ្ឋកូរ៉េ។ សម្តេចបវរធិបតី ហ៊ុន ម៉ាណែត បានចេញសេចក្តីណែនាំដ៏ម៉ឺងម៉ាត់ ដល់ថ្នាក់ដឹកនាំទូទាំងប្រទេស ពិសេសបណ្តារាជធានីខេត្តជាប់ទន្លេ និងសមុទ្រ ដោយសង្កត់ធ្ងន់លើសារៈសំខាន់នៃការយកចិត្តចំពោះសកម្មភាពរបស់រោចក្រ សហគ្រាសនានា ដែលបង្ហូរទឹក ចូលក្នុងប្រភពទឹកសាធារណៈ ត្រូវរៀបចំប្រព្រឹត្តកម្មទឹកកខ្វក់ឱ្យបានត្រឹមត្រូវ មុននឹងបង្ហូរចេញពីរោងចក្រ។ ក្នុងសុន្ទរកថានាព្រឹកមិញនេះ សម្តេចបវរធិបតីបានគូសបញ្ជាក់ពីតម្រូវការសំខាន់ក្នុងការធានាឱ្យរោងចក្រប្រព្រឹត្តិកម្មទឹកសំណល់ឱ្យបានត្រឹមត្រូវមុននឹងបញ្ចេញវាទៅក្នុងប្រភពទឹកសាធារណៈដើម្បីការពារសុខភាពសាធារណៈ និងការប្រើប្រាស់ក្នុងផលិតកម្មឧស្សាហកម្មនានា។ សម្តេចនាយករដ្ឋមន្ត្រីបានសង្កត់ធ្ងន់ថា ការរៀបចំគ្រប់គ្រងឱ្យបាននូវការធ្វើប្រព្រឹត្តិកម្មទឹកកខ្វក់ មានសារៈសំខាន់ដើម្បីបង្ការហានិភ័យធ្ងន់ធ្ងរដល់សុខភាពប្រជាពលរដ្ឋ និងសកម្មភាពឧស្សាហកម្ម។ សម្តេចបវរធិបតី បានរំឭកពីករណីរោងចក្រនៅខេត្តបាត់ដំបង ដែលបញ្ចេញទឹកសំណល់ដែលមិនបានកែច្នៃ ប៉ះពាល់យ៉ាងធ្ងន់ធ្ងរដល់ប្រជាពលរដ្ឋក្នុងមូលដ្ឋាន។ សម្តេចបវរធិបតី បានសង្កត់ធ្ងន់ថា «សូមឱ្យយកចិត្តទុកដាក់ ពិសេសនៅតាមបណ្តារាជធានីខេត្ត និងជាពិសេសនៅតាមបណ្តាខេត្តដែលជាប់ទន្លេ និងសមុទ្រ ធ្វើយ៉ាងរោងចក្រសហគ្រាសដែលនៅជិតនោះ បង្ហូរទឹកចូលត្រូវធ្វើយ៉ាងម៉េចឱ្យទឹកនោះត្រូវឆ្លងកាត់ការធ្វើប្រព្រឹត្តិកម្មឱ្យបាន»។ សម្តេចនាយករដ្ឋមន្ត្រីបានគូសបញ្ជាក់ថា រោងចក្រមួយចំនួនផលិតជាតិគីមីខ្ពស់ ដែលទាមទារឱ្យមានការត្រួតពិនិត្យបរិស្ថានតឹងរ៉ឹង។ សម្តេចបវរធិបតី ហ៊ុន ម៉ាណែត ណែនាំដល់មន្ទីរបរិស្ថាន និងអាជ្ញាធរខេត្ត ត្រូវចុះត្រួតពិនិត្យជាប្រចាំ និងដាក់ពិន័យយ៉ាងម៉ឺងម៉ាត់ចំពោះការរំលោភបំពាន។ សម្តេចបវរធិបតី បញ្ជាក់ថា រោងចក្រណាដែលបញ្ចេញទឹកកខ្វក់ត្រូវផ្អាករហូតដល់ដោះស្រាយបញ្ហា ដោយព្រមានថាការមិនអនុវត្តតាមអាចគំរាមកំហែងដល់សុខភាពសាធារណៈ។ សម្តេចបវរធិបតី បានមានប្រសាសន៍ថា «ប្រជាពលរដ្ឋមានសុខភាពល្អជាលាភ ជាទ្រព្យ តែពលរដ្ឋមានសុខភាពមិនល្អជាបន្ទុក» ដូច្នេះហើយ រាជរដ្ឋាភិបាលខិតខំកែលម្អសុខភាពសាធារណៈ។ សម្តេចបវរធិបតី បានពន្យល់ថា «សម្រាប់ប្រជាពលរដ្ឋម្នាក់ៗសុខភាពជាគោលសំខាន់ បើយើងមានសុខភាព យើងមានធនធាន បើសុខភាពលំបាកយើងជាបន្ទុក [...] ប្រជាពលរដ្ឋម្នាក់ជាបន្ទុកគ្រួសារម្នាក់ ប៉ុន្ដែប្រជាពលរដ្ឋច្រើនជាកម្លាំងសំខាន់របស់ជាតិ»។ សម្តេចបវរធិបតី បានឆ្លុះបញ្ចាំងបន្ថែមទៀតលើសមិទ្ធិផលរបស់រដ្ឋាភិបាលក្នុងរយៈពេល ២០ ឆ្នាំកន្លងមកនេះ រួមទាំងការពង្រីកហេដ្ឋារចនាសម្ព័ន្ធថែទាំសុខភាពដូចជាមន្ទីរពេទ្យ និងមជ្ឈមណ្ឌលឯកទេស ដែលបានធ្វើឱ្យប្រសើរឡើងយ៉ាងខ្លាំងនូវសេវាវេជ្ជសាស្រ្តនៅទូទាំងប្រទេសកម្ពុជា។ សម្តេចបវរធិបតី ហ៊ុន ម៉ាណែត អំពាវនាវឲ្យក្រសួងសាធារណការ និងដឹកជញ្ជូន សហការជាមួយក្រសួងពាក់ព័ន្ធ អាជ្ញាធរមូលដ្ឋាន និងដៃគូអភិវឌ្ឍន៍ រៀបចំផែនការមេអភិវឌ្ឍប្រព័ន្ធចម្រោះ និងប្រព្រឹត្តកម្មទឹកកខ្វក់ នៅទីក្រុង និងទីប្រជុំជនធំៗ ដោយធានាឲ្យមានសង្គតិភាពទៅ នឹងការអភិវឌ្ឍហេដ្ឋារចនាសម្ព័ន្ធរូបវ័ន្ត។ សម្តេចបវរធិបតីបានកោតសរសើរចំពោះទំនាក់ទំនងដ៏យូរអង្វែងរវាងប្រទេសកម្ពុជា និងកូរ៉េខាងត្បូង ដែលរយៈពេលជាង ២៨ ឆ្នាំបានក្លាយជាភាពជាដៃគូយុទ្ធសាស្ត្រជំរុញការវិនិយោគ ពាណិជ្ជកម្ម និងការផ្លាស់ប្តូរវប្បធម៌។ សម្តេចបវរធិបតី បានថ្លែងអំណរគុណចំពោះរដ្ឋាភិបាល និងប្រជាជនកូរ៉េខាងត្បូងសម្រាប់ការគាំទ្រផែនការអភិវឌ្ឍន៍របស់កម្ពុជា និងកិច្ចសហប្រតិបត្តិការបន្តក្នុងវិស័យសំខាន់ៗ ដែលរួមចំណែកយ៉ាងសំខាន់ដល់ហេដ្ឋារចនាសម្ព័ន្ធ និងកំណើនសេដ្ឋកិច្ចរបស់ប្រទេស។ ក្នុងពិធីនោះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានរាយការណ៍ពីសារៈសំខាន់នៃគម្រោងនេះ ដោយមានប្រសាសន៍ថា «ការអភិវឌ្ឍន៍នេះឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលក្នុងការកែលម្អហេដ្ឋារចនាសម្ព័ន្ធគ្រប់គ្រងទឹកសំណល់ ដើម្បីឆ្លើយតបទៅនឹងកំណើនទីក្រុងយ៉ាងឆាប់រហ័ស និងការកើនឡើងចំនួនប្រជាជននៅក្នុងទីក្រុងធំៗនៃប្រទេសកម្ពុជា»។ គម្រោងនេះមានធាតុផ្សំសំខាន់ៗចំនួនពីរ៖ ការសាងសង់ប្រព័ន្ធលូ និងប្រព័ន្ធបង្ហូរទឹកភ្លៀងដាច់ដោយឡែក និងវិធានការកាត់បន្ថយទឹកជំនន់។ កន្លែងប្រព្រឹត្តិកម្មទឹកសំណល់នឹងប្រើវិធីសាស្ត្រអាងចម្លោះធម្មជាតិ លើផ្ទៃដី ៣០ ហិកតា ដែលមានសមត្ថភាពចម្លោះទឹកកខ្វក់ចំនួន ១២ ០០០ ម៉ែត្រគុបក្នុងមួយថ្ងៃ។ គម្រោងនេះរួមមានការសាងសង់ស្ថានីយបូមទឹកសំណល់ចំនួន ៧ និងបណ្តាញលូទឹកកខ្វក់គ្រប់ប្រភេទ ១២៥ គីឡូម៉ែត្រ ដោយតភ្ជាប់តំបន់សេវាចំនួន ៦ គឺសង្កាត់កំពង់សំណាញ់ ដើមមៀន តាក្តុល ក្រុងតាខ្មៅ ព្រែកហូរ និងសង្កាត់ព្រែកឬស្សី ដែលមានផ្ទៃដីប្រមាណ ៩៧៤ ហិកតា ក្នុងក្រុងតាខ្មៅ។ ការសាងសង់ប្រព័ន្ធរំដោះទឹកជំនន់រួមមាន ការកសាងបណ្តាញលូបង្ហូរទឹកភ្លៀង រួមទាំងលូប្រអប់ និងលូមូលនៅតាមផ្លូវជាតិលេខ ២១ ចាប់ពីរង្វង់មូលតាខ្មៅ ប្រវែង ៥ គីឡូម៉ែត្រ។ គម្រោងនេះក៏រួមបញ្ចូលផងដែរនូវការសាងសង់ និងការស្តារឡើងវិញនូវស្ថានីយ៍បូមទឹកទឹកភ្លៀងចំនួនពីរ និងបណ្តាញលូបន្ថែមនៅក្នុងក្រុងតាខ្មៅ។ លោករដ្ឋមន្ត្រី បានសង្កត់ធ្ងន់លើធាតុផ្សំនៃការកសាងសមត្ថភាពរបស់គម្រោង ដោយកត់សម្គាល់ថា ការងហ្វឹកហាត់ប្រតិបត្តិការ និងថែទាំរយៈពេលមួយឆ្នាំនឹងធ្វើឡើងដើម្បីបង្កើនជំនាញរបស់មន្ត្រី និងបុគ្គលិកដែលទទួលខុសត្រូវលើការគ្រប់គ្រងប្រព័ន្ធ។ គម្រោងនេះត្រូវបានប្រតិបត្តិដោយការបណ្តាក់ទុនរួមគ្នារវាង KUMHO-TECHCROSS និងត្រួតពិនិត្យបច្ចេកទេសដោយ DOHWA-SEOYOUNG ជាមួយនឹងតម្លៃកិច្ចសន្យាសរុបលើសពី ៩០ លានដុល្លារអាមេរិក។ ការសាងសង់គ្រោងនឹងបញ្ចប់ក្នុងរយៈពេល៣៦ខែ ដោយគ្រោងបញ្ចប់ការសាងសង់នៅក្នុង ឆ្នាំ២០២៧៕