ភ្នំពេញ ៖ គិតត្រឹមដើមឆ្នាំ ២០២៥នេះ កម្ពុជាមានកំពង់ផែសមុទ្រ និងកំពង់ផែទន្លេចំនួន១១៩កន្លែង សម្រាប់បម្រើដល់ដឹកជញ្ជូនទំនិញ និងអ្នកដំណើរ ។ នេះបើតាមលោកប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន នៅក្នុងឱកាសបើកសម្ពោធកំពង់ផែទេសចរណ៍អន្តរជាតិខេត្តកំពតនៅថ្ងៃទី២១ ខែមេសា ឆ្នាំ ២០២៥ ។ បើតាមលោកប៉េង ពោធិ៍នា បានមានប្រសាសន៍បន្តថា ក្នុងចំណោមកំពង់ផែទាំង១១៩កន្លែង កំពង់ផែសមុទ្រមានចំនួន ៣១កន្លែង ដោយក្នុងនោះមានកំពង់ផែក្រុងព្រះសីហនុ និងកំពង់ផែ៣០ផ្សេងទៀតនៅតាមបណ្ដាកោះនានា ។ ចំណែកកំពង់ផែទន្លេវិញមានចំនួន ៨៨កន្លែង រាប់ទាំងកំពង់ផែស្វយ័តក្រុងភ្នំពេញ ។ លោកបន្ថែមថាកំពង់ផែទាំងអស់របស់កម្ពុជាបាននិងកំពុងលើកកម្ពស់ប្រសិទ្ធភាព និងពង្រីកវិសាលភាពនៃការដឹកជញ្ជូនតាមផ្លូវទឹកនិងផ្លូវសមុទ្រនៅកម្ពុជា ជារួមសម្រាប់សមិទ្ធផលថ្មីៗនៅក្នុងវិស័យសាធារណការ និងដឹកជញ្ជូន រាប់ចាប់ពីហេដ្ឋារចនាសម្ព័ន្ធផ្លូវថ្នល់ ស្ពានធំៗ ផ្លូវល្បឿនលឿន ផ្លូវដែក និងហេដ្ឋារចនាសម្ព័ន្ធកំពង់ផែនៅទូទាំងប្រទេស បានលេចជារូបរាង និងផ្ដល់អត្ថប្រយោជន៍ដ៏មហាសាលដល់សេដ្ឋកិច្ចកម្ពុជា ។ សម្រាប់កំពង់ផែទេសចរណ៍អន្តរជាតិដែលបានបើកសម្ពោធដាក់ឱ្យប្រើប្រាស់នៅថ្ងៃទី ២១ ខែមេសា ឆ្នាំ ២០២៥ ក្រោមអធិបតីភាព សម្ដេចមហាបវរធិបតីហ៊ុន ម៉ាណែត ជាសមិទ្ធផលថ្មីមួយក្នុងវិស័យដឹកជញ្ជូន ដែលអាចអនុញ្ញាតឱ្យនាវាដឹកភ្ញៀទេសចរប្រមាណជាង៣០០នាក់ចូលចតដោយសុវត្ថិភាព ។ បើតាមលោកប៉េង ពោធិ៍នា បានឱ្យដឹងថាក្នុងអំឡុងពេលដាក់ឱ្យដំណើរការសាកល្បងរយៈពេលជាង៣ខែមកនេះ កំពង់ផែទេសចរណ៍អន្តរជាតិខេត្តកំពត ទទួលបានភ្ញៀវទេសចរសរុបប្រមាណ៧០០០នាក់ឆ្លងកាត់កំពង់ផែមួយនេះ ដែលកំពង់ផែមួយនេះអាចដឹកភ្ញៀវទេសចរទៅកាន់បណ្ដាខេត្តកោះនានា ក្នុងតំបន់មសុទ្រកម្ពុជា ៕