ក្រុមការងាររាជរដ្ឋាភិបាលចុះមូលដ្ឋានស្រុកកោះធំ ប្រារព្ធពិធីអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមមូលបទ “សិទ្ធិ សមភាព និងភាពអង់អាច ចំពោះស្រ្តីនិងក្មេងស្រីគ្រប់រូប» កណ្តាល៖ នាព្រឹកថ្ងៃព្រហស្បតិ៍ ទី២០ ខែមីនា ឆ្នាំ២០២៥ លោកជំទាវ ឥម នីថារ៉ា រដ្ឋលេខាធិការ និងជាសមាជិកាក្រុមការងាររាជរដ្ឋាភិបាលចុះមូលដ្ឋានស្រុកកោះធំ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះធំ បានអញ្ជើញជាអធិបតីក្នុងពិធីអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមមូលបទ “សិទ្ធិ សមភាព និងភាពអង់អាច ចំពោះស្រ្តីនិងក្មេងស្រីគ្រប់រូប»។ កម្មវិធីនេះ បានប្រារព្ធនៅសាលាស្រុកកោះធំ ខេត្តកណ្តាល ដោយមានការអញ្ជើញចូលរួមពី លោកជំទាវជាមន្ត្រីជាន់ខ្ពស់ក្រសួង លោកជំទាវ ជាទីប្រឹក្សា លោកស្រី ជាថ្នាក់ដឹកនាំក្រសួង លោកស្រីប្រធានការិយាល័យ/អង្គភាព ចំណុះរដ្ឋបាលស្រុកកោះធំ សមាជិកាក្រុមប្រឹក្សាស្រុក ក្រុមចលនាស្ត្រីស្រុក នាយិកា-នាយិការងគ្រប់គ្រឹះស្ថានសិក្សា មន្ត្រីការិយាល័យចំណុះរដ្ឋបាលស្រុក កងកម្លាំងប្រដាប់អាវុធជាស្ត្រី មេឃុំទាំង៦ ប្រធាន-អនុប្រធាន និងសមាជិកបណ្តាញស្ត្រីថ្នាក់ឃុំ ប្រធាន និងអនុប្រធាន បណ្តាញស្ត្រីថ្នាក់ភូមិ សរុបប្រមាណ ២៣០រូប។ ពិធីអបអរសាទរខួបលើកទី១១៤ ទិវាអន្តរជាតិនារី ៨មីនា នៅស្រុកកោះធំនាឱកាសនេះ ត្រូវបានរៀបចំឡើងក្នុងគោលបំណងរំលេចនូវសក្តានុពល សារៈសំខាន់នៃការចូលរួម និងភាពជាតំណាងនៃស្រ្តី និងក្មេងស្រីគ្រប់រូប រំលឹកការទារសិទ្ធិ សេរីភាព និងឆ្លុះបញ្ចាំង អំពីវឌ្ឍនភាព សមិទ្ធផល បញ្ហាប្រឈម កាលានុវត្តភាពនានា និងបង្ហាញពីការប្ដេជ្ញាចិត្តនិងវិធានការវិជ្ជមាន ក្នុងការលើកកម្ពស់សមភាពយេនឌ័រ និងបង្កើតភាពអង់អាចដល់ស្រ្តី និងក្មេងស្រីគ្រប់រូប។ ថ្លែងក្នុងឱកាសនេះ លោកជំទាវរដ្ឋលេខាធិការ ក្នុងនាម ឯកឧត្តមរដ្ឋមន្ត្រី ក្រសួងសាធារណការ និងដឹកជញ្ជូន បានអំពាវនាវ និងសំណូមពរ ដល់ថ្នាក់ដឹកនាំនៃរដ្ឋបាលស្រុកកោះធំ គ្រប់លំដាប់ថ្នាក់ សូមបន្តប្រពៃណីក្នុងការរួមសហការ ដើម្បីដោះស្រាយនូវបញ្ហាប្រឈម របស់ស្ត្រី ក្មេងស្រី យុវវ័យ នៅក្នុងស្រុក ឱ្យបានល្អប្រសើរ ដោយយកចិត្តទុកដាក់អនុវត្តឱ្យមានសុវត្ថិភាព និងប្រសិទ្ធភាពខ្ពស់តាមតួនាទីរបស់ខ្លួន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube