សិក្ខាសាលាផ្សព្វផ្សាយ ស្ដីពីការរៀបចំសេចក្ដីព្រាងប្រកាសស្ដីពីការដឹកជញ្ជូនទំនិញគ្រោះថ្នាក់ នៅកម្ពុជា ទីស្ដីការក្រសួង ៖ នាព្រឹកថ្ងៃអង្គារ ទី១៨ ខែមីនា ឆ្នាំ២០២៥ ឯកឧត្តម សុន សុខកេង អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយ ស្តីពីការរៀបចំសេចក្ដីព្រាងប្រកាសស្ដីពីការដឹកជញ្ជូនទំនិញគ្រោះថ្នាក់ នៅកម្ពុជា សហការរៀបចំដោយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ដោយមានការអញ្ជើញចូលរួមពីថ្នាក់ដឹកនាំអគ្គនាយកដ្ឋានដឹកជញ្ជូនផ្លូវគោក តំណាងអង្គការ JICA សមាគមដឹកជញ្ជូន អ្នកជំនាញប្រឹក្សាយោបល់អន្តរជាតិស្តីពីការដឹកជញ្ជូនទំនិញគ្រោះថ្នាក់ ក្រុមហ៊ុនដឹកជញ្ជូន វិស័យឯកជន និងមន្ត្រីជំនាញពាក់ព័ន្ធ សរុបប្រមាណ៥០រូប។ សិក្ខាសាលានេះ រៀបចំឡើងក្នុងគោលបំណង ដើម្បីជជែកពិភាក្សាប្រមូលធាតុចូលបន្ថែមពីអ្នកជំនាញមកពីគ្រប់ភាគីពាក់ព័ន្ធទាំងអស់ធ្វើយ៉ាងណាឱ្យការរៀបចំសេចក្ដីព្រាងប្រកាសនេះមានភាពត្រឹមត្រូវ ច្បាស់លាស់ និងគ្រប់ជ្រុងជ្រោយ ព្រមទាំងទទួលបានការគាំទ្រពីថ្នាក់ដឹកនាំ និងគ្រប់ភាគីពាក់ព័ន្ធ ក្នុងការពន្លឿនសេចក្ដីព្រាងប្រកាសនេះឱ្យបានទាន់ពេលវេលា និងអាចយកទៅអនុវត្តបានគ្រប់គ្នា និងប្រកបដោយប្រសិទ្ធភាព។ ថ្លែងក្នុងកម្មវិធីបើកសិក្ខាសាលា ឯកឧត្ដមអនុរដ្ឋលេខាធិការ បានលើកឡើងពីសារៈសំខាន់ជាច្រើន នៃការរៀបចំសេចក្ដីព្រាងប្រកាសស្ដីពីការដឹកជញ្ជូនទំនិញគ្រោះថ្នាក់ នៅកម្ពុជា និងបានស្នើសុំអ្នកជំនាញ JICA រៀបចំវគ្គបណ្ដុះបណ្ដាលអំពីការដឹកជញ្ជូនទំនិញគ្រោះថ្នាក់ដល់មន្ត្រីពាក់ព័ន្ធ សមាគម ក្រុមហ៊ុន វិស័យឯកជន និងភាគីផ្សេងទៀត ដើម្បីពង្រឹងចំណេះដឹងថ្មីៗបន្ថែម សំដៅធានាបាននៅការគ្រប់គ្រងការដឹកជញ្ជូនទំនិញគ្រោះថ្នាក់ប្រកបដោយសុវត្ថិភាព ជាពិសេសរួមចំណែកកាត់បន្ថយគ្រោះថ្នាក់ចរាចរណ៍នៅកម្ពុជាឱ្យនៅកម្រិតទាប៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube