កិច្ចប្រជុំបូកសរុបលទ្ធផលការងារគណបក្សរយៈពេល៣ខែ ដើមឆ្នាំ២០២៥ និងផ្សព្វផ្សាយខ្លឹមសារ នៃលទ្ធផលសន្និបាតគណៈកម្មាធិការកណ្តាល លើកទី៤៥ អាណត្តិទី៥ របស់គណបក្សប្រជាជនកម្ពុជា ក្រោមអធិបតីភាព ឯកឧត្តម ឈួន វិន សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តមណ្ឌលគិរី មណ្ឌលគិរី៖ នាថ្ងៃសៅរ៍ ទី១៥ ខែមីនា ឆ្នាំ២០២៤ ឯកឧត្តម ឈួន វិន ប្រធានក្រុមការងារគណបក្សចុះមូលដ្ឋានខេត្តមណ្ឌលគិរី បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារគណបក្សរយៈពេល៣ខែ ដើមឆ្នាំ២០២៥ និងផ្សព្វផ្សាយខ្លឹមសារ នៃលទ្ធផលសន្និបាតគណៈកម្មាធិការកណ្តាល លើកទី៤៥ អាណត្តិទី៥ របស់គណបក្សប្រជាជនកម្ពុជា ខេត្តមណ្ឌលគិរី ដោយមានការចូលរួមពី ឯកឧត្តម ដួង ហេង សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាអនុប្រធានទីមួយ នៃក្រុមការងារគណបក្សចុះមូលដ្ឋានខេត្តមណ្ឌលគិរី ឯកឧត្តម ថង សាវុន សមាជិកគណៈកម្មាធិការកណ្ដាល និងជាប្រធានគណៈកម្មាធិការគណបក្សខេត្តមណ្ឌលគិរី ឯកឧត្តម ម៉ែន ងុយ សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈប្រចាំការ នៃគណៈអចិន្ត្រៃយ៍គណៈកម្មាធិការគណបក្សខេត្ត និងជាអនុប្រធានគណបក្សខេត្ត និងឯកឧត្តម លោកជំទាវ សមាជិកគណៈកម្មាធិការកណ្តាលគណបក្ស ឯកឧត្តម លោកជំទាវ អនុប្រធានក្រុមការងារ សមាជិក សមាជិកា ក្រុមការងារគណបក្សចុះមូលដ្ឋានខេត្តមណ្ឌលគិរី។ ថ្លែងទៅកាន់អង្គពិធី ឯកឧត្តមប្រធាន បានផ្តាំផ្ញើនូវការសាកសួរសុខទុក្ខ និងក្តីនឹករលឹកដ៏ជ្រាលជ្រៅបំផុតពីសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា សម្តេចមហាបរវធិបតីនាយករដ្ឋមន្ត្រី ហ៊ុន ម៉ាណែត អនុប្រធានគណបក្សប្រជាជនកម្ពុជា ជូនចំពោះឯកឧត្តម លោកជំទាវ លោក លោកស្រី និង សមាជិក សមាជិកាគណបក្សនៅមូលដ្ឋាន។ ឯកឧត្តមប្រធាន ក៏បានគូសរំលេចផងដែរនូវស្នាដៃ និងសមិទ្ធផលការងារធំៗមួយចំនួនរបស់រាជរដ្ឋាភិបាល នីតិកាលទី៧ ក្រោមការដឹកនាំដ៏វាងវៃរបស់សម្តេចធិបតី ជាអនុប្រធានគណបក្សប្រជាជនកម្ពុជា និងបានសម្ដែងនូវមោទនភាពចំពោះសមិទ្ធផលជាប្រវត្តិសាស្ត្ររបស់គណបក្សសម្រេចបាននាពេលនេះ ជាការឆ្លុះបង្ហាញនូវជំនឿជាក់ទំនុកចិត្ត សាមគ្គីភាព ឯកភាពផ្ទៃក្នុង ការស្មោះស្ម័គ្រ និងគាំទ្ររបស់គណបក្សប្រជាជនកម្ពុជា ជាគណបក្សធានាបាននូវសន្តិភាព ស្ថិរភាព និងមាគ៌ាអភិវឌ្ឍន៍។ ក្នុងឱកាសនេះ ក៏មានពិធីប្រកាសសមាសភាពសមាជិកគណៈអចិន្ត្រៃយ៍ និងសមាជិកគណៈកម្មាធិការគណបក្សខេត្ត ក្រុមការងារចលនាកសាងសមាជិកគណបក្សមូលដ្ឋានក្រុង ស្រុក ព្រមទាំងពិធីប្រគល់ត្រាមូលគណបក្សជូនប្រធានគណៈកម្មាធិការគណបក្សមូលដ្ឋានសាលាខេត្ត ប្រធានគណៈកម្មាធិការគណបក្សមន្ទីរកសិកម្ម រុក្ខាប្រមាញ់ និងនេសាទ មន្ទីរអប់រំ យុវជន និងកីឡា និង មន្ទីរសុខាភិបាល ក្នុងពេលជាមួយគ្នាផងដែរ។ ឆ្លៀតក្នុងឱកាសនោះដែរ ឯកឧត្តមប្រធានបានជំរុញលើកទឹកចិត្តឱ្យក្រុមការងារគណបក្សចុះមូលដ្ឋាន ជួយពង្រឹងគណបក្សទាំងខាងនយោបាយ សតិអារម្មណ៍ និងចាត់តាំង ព្រមទាំងជំរុញការលើកកម្ពស់ប្រសិទ្ធភាពក្នុងការបំពេញការងារ និងការទទួលខុសត្រូវ ដែលគណបក្សបានកំណត់ និងបានស្នើឱ្យគិតគូរជាមុននូវផែនការសកម្មភាព ពិសេសការលះបង់ពេលវេលាចុះបំពេញការងារនៅមូលដ្ឋានដែលខ្លួនទទួលខុសត្រូវរៀងៗខ្លួន ដើម្បីពង្រឹងគុណភាពការងារគណបក្សនៅមូលដ្ឋានកាន់តែរឹងមាំថែមទៀត៕