ក្រសួងសាធារណការ និងដឹកជញ្ជូន និងក្រុមហ៊ុនក្នុងស្រុក រ៉ូយ៉ាល់រេលវេ ម.ក.(Royal Railway) បានចុះហត្ថលេខាលើកិច្ចព្រមព្រៀងក្របខ័ណ្ឌផ្លូវដែក(Framework Agreement-FA) ដើម្បីឈានទៅរកភាពជាដៃគូរវាងរដ្ឋ និងឯកជន ក្នុងន័យអភិវឌ្ឍន៍ផ្លូវដែកនៅកម្ពុជាឱ្យកាន់តែមានភាពល្អប្រសើរ ស្របតាមចក្ខុវិស័យរបស់រាជរដ្ឋាភិបាលក្នុងការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូនគ្រប់ប្រភេទ។ពិធីចុះហត្ថលេខាលើកិច្ចព្រមព្រៀងក្របខ័ណ្ឌផ្លូវដែក(Framework Agreement-FA) រវាងរដ្ឋាភិបាល និងក្រុមហ៊ុន រ៉ូយ៉ាល់ រេលវេ ម.ក. បានធ្វើឡើងនៅទីស្តីការក្រសួងសាធារណការ និងដឹកជញ្ជូន កាលពីថ្ងៃ១៣ ខែកុម្ភៈ ឆ្នាំ២០២៥ រវាងលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ជាមួយ លោក គិត ម៉េង ប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់រេលវេ ម.ក.(RRPLC)។ ក្រសួងសាធារណការ បានឱ្យដឹងថា កិច្ចព្រមព្រៀងនេះ គឺជំហានដំបូងដើម្បីជាមូលដ្ឋានឈានដល់ការចរចា និងចុះកិច្ចព្រមព្រៀងភាពជាដៃគូរវាងរដ្ឋ និងឯកជន និងស្វែងរកដៃគូយុទ្ធសាស្រ្តដែលមានចំណេះជំនាញ និងបទពិសោធលើវិស័យផ្លូវដែកដើម្បីចូលរួមអភិវឌ្ឍន៍ផ្លូវដែកនៅកម្ពុជាឱ្យមានភាពល្អប្រសើរ និងមានប្រសិទ្ធភាពខ្ពស់ ស្របតាមចក្ខុវិស័យរបស់រាជរដ្ឋាភិបាលកម្ពុជា។នៅលើបណ្តាញសង្គមហ្វេលប៊ុកផ្លូវការរបស់ ក្រុមហ៊ុន រ៉ូយ៉ាល់ រេលវេ បានសរសេរថា៖«យើងខ្ញុំមានមោទនភាពជាខ្លាំងក្នុងការប្រកាសអំពីការចុះហត្ថលេខាលើកិច្ចព្រមព្រៀងគោលការណ៍ (Framework Agreement) ជាផ្លូវការជាមួយក្រសួងសាធារណការ និងដឹកជញ្ជូន នៅរសៀលថ្ងៃទី១៣ ខែកុម្ភៈ ឆ្នាំ២០២៥។ ព្រឹត្តិការណ៍នេះបង្ហាញពីគោលជំហានយ៉ាងសំខាន់ក្នុងការពង្រឹងហេដ្ឋារចនាសម្ព័ន្ធផ្លូវរថភ្លើងនៃកម្ពុជា និងធានាបាននូវដំណោះស្រាយដឹកជញ្ជូនដ៏ប្រសើរ និងគ្រប់គ្រងបានយូរអង្វែងសម្រាប់អនាគត»។ ក្រុមហ៊ុនបានបន្តថា៖«កិច្ចព្រមព្រៀងនេះបង្ហាញពីការខិតខំប្រឹងប្រែងយ៉ាងខ្លាំងក្លារបស់រាជរដ្ឋាភិបាលកម្ពុជាក្នុងការពង្រឹងការតភ្ជាប់ផ្លូវរថភ្លើង និងជំរុញកំណើនសេដ្ឋកិច្ច។ រ៉ូយ៉ាល់ រេលវេ នៅតែបន្តខិតខំផ្តល់នូវសេវាកម្មផ្លូវរថភ្លើងដ៏ល្អប្រសើរបំផុតដើម្បីជំរុញការអភិវឌ្ឍនៃប្រទេសកម្ពុជា»។ការសម្រេចបានកិច្ចព្រមព្រៀងនេះ គឺស្របតាមការណែនាំរបស់ លោកនាយករដ្ឋមន្រ្តី ហ៊ុន ម៉ាណែត ដែលបានណែនាំឱ្យក្រសួងសាធារណការ និងដឹកជញ្ជូនពិនិត្យមើលលទ្ធភាពលើការអភិវឌ្ឍ ស្ថាបនា និងការតភ្ជាប់បណ្ដាញផ្លូវដែក សម្រាប់ការដឹកញ្ជូនទំនិញរបស់កម្ពុជាទាំងក្នុងប្រទេស និងតភ្ជាប់ទៅប្រទេសក្នុងតំបន់។ ប្រធានសមាគមភស្តុភារកម្មកម្ពុជា លោក ស៊ិន ចន្ធី បានប្រាប់ភ្នំពេញប៉ុស្តិ៍ក្នុងថ្ងៃទី១៤ ខែកុម្ភៈ ថា លោកពិតជាមានក្តីរីករាយជាខ្លាំងចំពោះការយកចិត្តទុកដាក់របស់រាជរដ្ឋាភិបាលក្នុងការជំរុញការអភិវឌ្ឍផ្លូវដែកនៅកម្ពុជាឱ្យកាន់តែរីកចម្រើនទៅមុខ។ ការអភិវឌ្ឍផ្លូវដែកនឹងផ្តល់ផលចំណេញច្រើនសម្រាប់សេដ្ឋកិច្ចកម្ពុជា ព្រោះផ្លូវដែកគឺគេអាចដឹកទំនិញបានច្រើន មិនស្ទះចរាចរណ៍ និងតម្លៃទាប ដែលចំណុចទាំងអស់នេះគឺសុទ្ធតែជួយកាត់បន្ថយថ្លៃដើមផលិតឱ្យកាន់តែទាប និងលើកកម្ពស់សមត្ថភាពប្រកួតប្រជែងតម្លៃទំនិញនៅលើទីផ្សារអន្តរជាតិ។ លោកបានបញ្ជាក់ថា៖«ការដឹកជញ្ជូនតាមផ្លូវដែកនៅតែជាមធ្យោបាយមួយដ៏សំខាន់សម្រាប់វិស័យដឹកជញ្ជូន និងឡូជីស្ទិក។ នៅលើពិភពលោកក៏មានតម្រូវការខ្លាំងក្នុងដឹកជញ្ជូនតាមផ្លូវដែក។ អ៊ីចឹងហើយ តាមរយៈការធ្វើកិច្ចព្រមព្រៀងនេះយើងសង្ឃឹមថា អនាគតក្រុមហ៊ុន រ៉ូយ៉ាល់ រេលវេ ម.ក. ក៏ដូចជាក្រសួងសាធារណការ និងដឹកជញ្ជូន នឹងជំរុញកិច្ចការនេះឱ្យកាន់តែប្រសើរឡើង។ លោកបានប្រាប់ទៀតថា ថ្មីៗនេះក្រុមហ៊ុន រ៉ូយ៉ាល់ រេលវេ ក៏ទើបបានបញ្ជាទិញទូររថភ្លើងសម្រាប់ដឹកកុងតឺន័រជាច្រើនគ្រឿងផងដែរ ដូច្នេះអនាគតវិស័យដឹកជញ្ជូនតាមផ្លូវដែកកម្ពុជានឹងកាន់តែប្រសើរ។ លោកនាយករដ្ឋមន្ត្រី ហ៊ុន ម៉ាណែត នៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន កាលពីថ្ងៃទី២៣ ខែមករា ឆ្នាំ២០២៥ បានលើកឡើងថា រាជរដ្ឋាភិបាល នីតិកាលទី៧ នៅតែចាត់ទុកការងារវិស័យសាធារណការ និងដឹកញ្ជូន គឺជាការងារអាទិភាពរបស់រាជរដ្ឋាភិបាលដើម្បីជួយជំរុញដល់កំណើន ការអភិវឌ្ឍសេដ្ឋកិច្ច និងសង្គមកម្ពុជា។ ក្រសួងសាធាណការ ត្រូវតែខិតខំជំរុញការស្ថាបនា និងការតភ្ជាប់បណ្ដាញផ្លូវដែកសម្រាប់ការដឹកញ្ជូនទំនិញ។ ក្នុងឆ្នាំ២០២៤ ក្រោមកិច្ចសហប្រតិបត្តិការវិនិយោគជាមួយក្រុមហ៊ុន រ៉ូយ៉ាល់រេលវេ ការដឹកជញ្ជូនទំនិញតាមផ្លូវដែកទាំងពីរទិស រួមមានខ្សែផ្លូវដែកទិសខាងជើង (ភ្នំពេញ- ប៉ោយប៉ែត) និងខ្សែផ្លូវដែកទិសខាងត្បូង (ភ្នំពេញ-ក្រុងព្រះសីហនុ) សម្រេចបានចំនួន ១,១៦ លានតោន កើនឡើង ៨,២៩ភាគរយបើធៀបនឹងឆ្នាំ២០២៣ ដែលមានចំនួន ១,០៧លានតោន និងមានអ្នកដំណើរ សរុបចំនួន ១០,៤១ម៉ឺននាក់ ថយចុះ ១៦,៩៨% ធៀបនឹងឆ្នាំ២០២៣ ដែលមានចំនួន ១២,៥៤ ម៉ឺននាក់។ នេះបើតាមរដ្ឋមន្ត្រីក្រសួងសាធារណការ និងដឹកជញ្ជូន៕