នាព្រឹកថ្ងៃទី២៧ ខែមករា ឆ្នាំ២០២៥ មន្ទីរសាធារណការ និងដឹកជញ្ជូនខេត្តបន្ទាយមានជ័យ សហការជាមួយនគរបាលចរាចរណ៍ នៃស្នងការដ្ឋាននគរបាលខេត្ត ក្រុមយុវជនកាកបាទក្រហមខេត្ត ចុះធ្វើការអប់រំផ្សព្វផ្សាយ ដល់បងប្អូនប្រជាពលរដ្ឋដែលកំពុងតែបើកបរយានយន្ត តាមដងផ្លូវជាតិលេខ៥ ត្រង់ចំណុចព្រះសព កែងច្រកចូលឃុំបត់ត្រង់ ក្នុងស្រុកមង្គលបុរី។ លោក ពុទ្ធញាណ ដារិទ្ធ ប្រធានការិយាល័យសុវត្ថិភាពចរាចរណ៍ផ្លូវគោក នៃមន្ទីរសាធារណការ និងដឹកជញ្ជូនខេត្ត និងលោក គី មករា ប្រធានការិយាល័យចរាចរណ៍នៃស្នងការដ្ឋាននគរបាលខេត្ត បានលើកឡើងថា ការចុះអប់រំផ្សព្វផ្សាយសុវត្ថិភាពចរាចរណ៍ផ្លូវគោក ក្នុងឱកាសបុណ្យចូលឆ្នាំចិន នាពេលនេះ គឺក្នុងគោលបំណងឲ្យបងប្អូន តាមដងផ្លូវសាធារណៈ គោរពច្បាប់ថ្នាក់ចរាចរណ៍ បើកបរម៉ូតូត្រូវពាក់មួកសុវត្ថិភាពទាំងអ្នកបើកបរទាំងអ្នករួមដំណើរតាមរថយន្តត្រូវពាក់ខ្សែក្រវាត់ឲ្យបានត្រឹមត្រូវ និងបើកបរត្រូវចេះយោគយល់អធ្យាស្រ័យ ពិសេសបើកបរយានយន្តគ្រប់ប្រភេទដោយគ្មានជាតិស្រវឹង។ អស់រយៈពេលពេញមួយព្រឹក មន្ត្រីដែលបានធ្វើការចុះអប់រំផ្សព្វផ្សាយនេះយើងសង្កេតឃើញមានបងប្អូនប្រជាពលរដ្ឋមួយចំនួន នៅតែពុំទាន់គោរពច្បាប់ចរាចរណ៍នោះឡើយ ពិសេស មិនពាក់មួកសុវត្ថិភាព ក្នុងនោះ លោកឧត្តមសេនីយ៍ត្រី ង៉ាន់ ចិន្ដា ស្នងការរងខេត្ត ក៏បានប្រគល់មួក សុវត្ថិភាពជូនដល់បងប្អូនប្រជាពលរដ្ឋផងដែរ៕