ស្មារតី ៧ មករា មានគុណតម្លៃជាអមតៈសម្រាប់ជាតិ និងប្រជាជនកម្ពុជា ក្នុងការបន្តដំណើរលើមាគ៌ា ឯករាជ្យ សន្តិភាព សេរីភាព អព្យាក្រឹត ប្រជាធិបតេយ្យ និងវឌ្ឍនភាពសង្គម ខេត្តមណ្ឌលគិរី៖ នាព្រឹកថ្ងៃទី៧ ខែមករា ឆ្នាំ២០២៥ ឯកឧត្តម ឈួន វិន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញជាអធិបតី ក្នុងពិធីអបអរសាទរខួបអនុស្សាវរីយ៍លើកទី៤៦ ទិវាជ័យជម្នះ ៧ មករា ដែលមានការនិមន្ត និងអញ្ជើញចូលរួមដោយ ព្រះសង្ឃ ព្រមទាំង ឯកឧត្តមប្រធានក្រុមប្រឹក្សាខេត្ត ឯកឧត្តមអភិបាល នៃគណៈអភិបាលខេត្ត ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកា ក្រុមការងារគណបក្សចុះមូលដ្ឋានខេត្តមណ្ឌលគិរី អាជ្ញាធរមូលដ្ឋាន និងបងប្អូនប្រជាពលរដ្ឋ ប្រមាណ ១៥១៥អង្គ/នាក់។ ថ្លែងក្នុងអង្គពិធី ឯកឧត្តម ថង សាវុន អភិបាល នៃគណៈអភិបាលខេត្តមណ្ឌលគិរី បានអានសារលិខិតរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា ក្នុងឱកាសពិធីអបអរសាទខួបអនុស្សាវរីយ៍លើកទី៤៦ ទិវាជ័យជម្នះ ៧មករា និងការលើកឡើងនូវចំណាប់អារម្មណ៍ របស់តំណាងយុវជនគណបក្សខេត្តមណ្ឌលគិរី ប្រគេនជូន និងជូនដល់អង្គពិធីផងដែរ។ បន្ថែមពីនោះ ឯកឧត្តម ឈួន វិន ប្រធានក្រុមការងារ ក៏បានលើកឡើង អំពីសារសំខាន់ នៃទិវាជ័យជម្នះ ៧ មករា ឆ្នាំ ១៩៧៩ គឺជាថ្ងៃប្រវត្តិសាស្ត្រ កម្ពុជាត្រូវសង្គ្រោះ និងរំដោះចេញផុតពីរបបប្រល័យពូជសាសន៍ ប៉ុល ពត ដែលជារបបខ្មៅងងឹតបំផុត។ ជាមួយគ្នានេះផងដែរ ឯកឧត្តមប្រធាន បានពាំនាំការអំពាវនាវរបស់ សម្តេចតេជោ ឱ្យបងប្អូនប្រជាពលរដ្ឋរួបរួមគ្នាថែរក្សាសន្តិភាព ពង្រឹងឯកភាពជាតិខ្មែរ និងរួមគ្នាថែរក្សាសមិទ្ធផលជាតិឱ្យបានគង់វង្ស ដើម្បីជាប្រយោជន៍ដល់ប្រជាពលរដ្ឋគ្រប់ជំនាន់។ ឯកឧត្តមប្រធាន បានគូសបញ្ជាក់ អំពីការប្តេជ្ញារបស់ សម្តេចមហាបវរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នូវការការពារឯករាជ្យ សុខសន្តិភាព ខិតខំដឹកនាំប្រទេសជាតិឱ្យមានការរីកចម្រើនបន្តទៀត ដើម្បីកសាងកម្ពុជាឱ្យក្លាយជាប្រទេសជឿនលឿន ជាសង្គមប្រកបដោយអរិយធម៌ ដែលគ្មានការកើតជាថ្មីទៀត នូវការបែកបាក់ជាតិ សង្រ្គាម និងអំពើប្រល័យពូជសាសន៍ ដូចពីអតីតកាល។ សូមបញ្ជាក់ផងដែរថា ខួបអនុស្សាវរីយ៍ ទិវាជ័យជម្នះ ៧ មករា ត្រូវបាន ប្រារព្ធឡើង ជារៀងរាល់ឆ្នាំនៅទូទាំងរាជធានីខេត្តយ៉ាងអធិកអធម ជាមួយនឹងការសាទរចំពោះ សមិទ្ធផលគ្រប់វិស័យដែលសម្រេចនាពេលកន្លងមក ក្រោយពីប្រទេសជាតិ ត្រូវបាន រំដោះ ប្រជាពលរដ្ឋមានសិទ្ធិសេរីភាព សុខសន្តិភាព និងការអភិវឌ្ឍរីកចម្រើនលើគ្រប់វិស័យជាបន្តបន្ទាប់៕