ចុះប្រគល់រថយន្តដល់កាលកំណត់ឃាត់រក្សាទុក ១ឆ្នាំ ចំនួន ១៤គ្រឿង នៅទីតាំងអនុស្ថានីយ រំចេក ខេត្តព្រៃវែង និងស្ថានីយ កំពង់ទួល ខេត្តកណ្តាល នៅព្រឹកថ្ងៃទី២៣ ខែធ្នូ ឆ្នាំ២០២៤ ឯកឧត្តម គឹម សាន់ អនុរដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ និងជាប្រធានក្រុមការងារត្រួតពិនិត្យចល័តចម្រុះ បានដឹកនាំគណៈប្រតិភូក្រសួង ចុះទៅប្រគល់រថយន្តដែលបានដឹកលើសទម្ងន់ចំនួន ២០% នៃច្បាប់អនុញ្ញាត និងបានឃាត់ទុករយៈពេល ១ឆ្នាំ កាលពីថ្ងៃទី២៣ ខែធ្នូ ឆ្នាំ២០២៣ ចំនួន ១៤គ្រឿង ក្នុងនោះនៅទីតាំងអនុស្ថានីយ រំចេក ខេត្តព្រៃវែង ចំនួន ០៨គ្រឿង និងស្ថានីយ កំពង់ទួល ខេត្តកណ្តាល ចំនួន ០៦គ្រឿង។ សូមរំលឹកដែរថា គិតមកត្រឹមថ្ងៃនេះ រថយន្តដែលឃាត់រក្សាទុក ១ឆ្នាំ នៅសល់ចំនួន ១១៦គ្រឿង ដែលពុំទាន់ដល់ពេលវេលាកំណត់ប្រគល់ជូនទៅម្ចាស់រថយន្តយកទៅប្រើប្រាស់ឡើងវិញ។ ឆ្លៀតក្នុងឱកាសនេះ ឯកឧត្តមប្រធាន ក៏បានស្នើសុំដល់ម្ចាស់រថយន្តទាំង ១៤គ្រឿងខាងលើ ពេលដែលទទួលយករថយន្តទៅប្រើប្រាស់វិញ សូមបញ្ឈប់ការដឹកលើសទម្ងន់កម្រិតកំណត់ ដើម្បីចៀសវាងការពិន័យ និងឃាត់ទុករថយន្តទុកម្តងទៀត ដែលនាំឱ្យខាតបង់ទាំងពេលវេលា និងថវិកា ព្រមទាំងជួយផ្សព្វផ្សាយទៅដល់បងប្អូនដែលប្រកបរបរដឹកជញ្ជូនទំនិញទាំងអស់ ឱ្យចូលរួមគោរពអនុវត្តតាមច្បាប់ឱ្យបានត្រឹមត្រូវ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube