ឯកឧត្តម ហេង ណន ដឹកនាំគណ:ប្រតិភូក្រសួងសាធារណការ និងដឹកជញ្ជូន ចូលរួមពិព័រណ៍ពិភពលោកលើកទី១៩ នៃសហព័ន្ធបញ្ជូនទំនិញអន្តរជាតិ ទីក្រុង Ningbo ប្រទេសចិន៖ នាថ្ងៃទី២៦ ខែវិច្ឆិកា ឆ្នាំ២០២៤ ឯកឧត្តម ហេង ណន រដ្ឋលេខាធិការ បានដឹកនាំគណ:ប្រតិភូក្រសួងសាធារណការ និងដឹកជញ្ជូន ចូលរួមពិព័រណ៍ពិភពលោកលើកទី១៩ នៃសហព័ន្ធបញ្ជូនទំនិញអន្តរជាតិ (the 19th World International Freight Forwarding Alliance Expo - WIFFA EXPO) ដែលរៀបចំឡើងដោយ China Federation of Logistics and Purchasing (CFLP) World International Freight Forwarding Alliance (WIFFA) Branch ក្រោមប្រធានបទ «China Industries and Logistics Going to Overseas»។ កម្មវិធីពិព័រណ៍ WIFFA EXPO-2024 នេះ ត្រូវបានរៀបចំឡើងក្នុងគោលបំណង៖ គឺជាថ្នាល (Platform) សម្រាប់ផ្តល់ឱកាសឱ្យក្រុមហ៊ុនដឹកជញ្ជូន និងឡូជីស្ទីក បានជួបគ្នា និងបង្កើតបណ្តាញធុរកិច្ចនៅក្នុងក្របខណ្ឌតំបន់ និងពិភពលោក ដែលមានចំនួនអ្នកតាំងពិព័រណ៍ប្រមាណ ២០០០នាក់ និងអ្នកចូលរួមប្រមាណ ៥០ ០០០នាក់ រួមមាន ក្រុមហ៊ុនដឹកជញ្ជូនតាមផ្លូវគោក ផ្លូវសមុទ្រ ផ្លូវដែក ផ្លូវអាកាស និងកំពង់ផែ ប្រតិបត្តិករឃ្លាំង ប្រតិបត្តិករភស្តុភារកម្ម និងក្រុមហ៊ុននានាក្នុងវិស័យយានយន្ត ថាមពល និងធនាគារ មកពីបណ្តាប្រទេសនានាជាងមួយរយ។ ស្ថិតក្នុងឱកាសផងដែរ ឯកឧត្តម ហេង ណន បានធ្វើបទអន្តរាគមន៍ ដោយរំលេចលក្ខណៈអំណោយផលរបស់ប្រទេសកម្ពុជា ដែលជាំទីតាំងល្អបំផុតសម្រាប់មជ្ឈមណ្ឌលដឹកជញ្ជូន និងមជ្ឈមណ្ឌលភស្តុភារកម្មនៅក្នុងតំបន់ ដោយប្រទេសកម្ពុជាមានឧត្តមភាពប្រៀបធៀប (Comparative Advantage) ដូចជា៖ ទីតាំងយុទ្ធសាស្រ្តនៅចំកណ្តាលតំបន់អាស៊ីអគ្នេយ៍ ច្បាប់វិនិយោគដែលមានលក្ខណៈសេរីជាងគេក្នុងតំបន់ ហេដ្ឋារចនាសម្ព័ន្ធតភ្ជាប់ក្នុងប្រទេស និងក្នុងតំបន់ លើសពីនេះទៅទៀតគឺ ប្រទេសកម្ពុជាមានរដ្ឋាភិបាលដែលគាំទ្រវិនិយោគិន (Pro-business government)។ បន្ថែមពីលើនេះ ឯកឧត្តម ក៏បានអំពាវនាវជំរុញដល់ក្រុមហ៊ុនចិនឱ្យមកធ្វើការវិនិយោគនៅប្រទេសកម្ពុជា ដើម្បីជំរុញកម្ពុជាឱ្យក្លាយទៅជា Regional Hub។ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានឯកភាពជាមួយ China Federation of Logistics and Purchasing (CFLP) World International Freight Forwarding Alliance (WIFFA) Branch ដើម្បីចុះហត្ថលេខាលើអនុស្សរណៈយោគយល់ (MoU) រវាងស្ថាប័នទាំងពីរ ក្នុងគោលបំណងពង្រឹងកិច្ចសហប្រតិបត្តិការរវាងស្ថាប័នទាំងពីរ អគ្គនាយកដ្ឋានភស្តុភារកម្ម និង CFLP ដែល MoU មានសំខាន់ចំនួន ៣ រួមមាន៖ (១) ចែករំលែកព័ត៌មានរវាងស្ថាប័នទាំងពីរ, (២) កិច្ចសហការក្នុងការរៀបចំពិរព័រណ៍ WIFFA ប្រចាំឆ្នាំនិង (៣) កិច្ចសហការក្នុងការកំណត់ និងរៀបចំគម្រោងនានា ដើម្បីជំរុញការអភិវឌ្ឍន៍វិស័យវិស័យភស្តុភារកម្ម៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube