សិក្ខាសាលាបណ្តុះបណ្តាល ស្តីពីយន្តការនៃការរៀបចំផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន រាជធានីភ្នំពេញ៖នាថ្ងៃពុធ ទី២០ ខែវិច្ឆិកា ឆ្នាំ២០២៤ ឯកឧត្តម សឿន ប៊ុនលី អគ្គនាយក នៃអគ្គនាយកដ្ឋានផែនការ និងគោលនយោបាយ ក្រសួងសាធារណការ និងដឹកជញ្ជូន បានអញ្ជើញជាអធិបតីដឹកនាំសិក្ខាសាលាបណ្តុះបណ្តាល ស្តីពីយន្តការនៃការរៀបចំផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន ដោយមានការអញ្ជើញចូលរួមពី ឯកឧត្តមជាទីប្រឹក្សាក្រសួង លោក លោកស្រីជាថ្នាក់ដឹកនាំអគ្គនាយកដ្ឋាន និងអង្គភាពជំនាញពីអង្គភាពថ្នាក់ជាតិ ថ្នាក់ក្រោមជាតិ និងសហគ្រាសសាធារណៈ សរុបប្រមាណ ១៥០រូប។ សិក្ខាសាលាបណ្ដុះបណ្ដាលនេះ រៀបចំឡើងក្នុងគោលបំណងធ្វើការបណ្តុះបណ្តាលបន្ថែមពីយន្តការនៃការរៀបចំផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន ដែលអនុវត្តដោយអង្គភាពក្រោមឱវាទក្រសួងឱ្យមានសង្គតិភាព ប្រសិទ្ធភាព ស័ក្តិសិទ្ធភាព និងគណនេយ្យភាព ដើម្បីផ្សារភ្ជាប់ គាំទ្រ និងជំរុញការអនុវត្តយុទ្ធសាស្រ្តបញ្ចកោណ ផែនការអភិវឌ្ឍន៍ និងគោលនយោបាយនានារបស់រាជរដ្ឋាភិបាលឱ្យទទួលបានជោគជ័យទាន់ពេលវេលាកំណត់។ សូមជម្រាបជូនថាយុទ្ធសាស្រ្តបញ្ចកោណ ដំណាក់កាលទី១ ត្រូវបានរាជរដ្ឋាភិបាល នីតិកាលទី៧ នៃរដ្ឋសភា បានដាក់ឱ្យអនុវត្តកាលពីថ្ងៃទី២៤ ខែសីហា ឆ្នាំ២០២៣ និងបានផ្តោតលើអាទិភាពគន្លឹះចំនួន៥ គឺ៖ “មនុស្ស ផ្លូវ ទឹក ភ្លើង និងបច្ចេកវិទ្យា” ដែល “ផ្លូវ” នៅតែជាអាទិភាពខ្ពស់ទី២ សម្រាប់ឆ្លើយតបទៅនឹងតម្រូវការអភិវឌ្ឍន៍សេដ្ឋកិច្ច និងសង្គមកម្ពុជាទាំងក្នុងពេលបច្ចុប្បន្ន និងនៅពេលអនាគត។ ក្នុងន័យនេះ ដើម្បីសម្រេចបាននូវគោលដៅចម្បងនៃយុទ្ធសាស្រ្តបញ្ចកោណ ដំណាក់កាលទី១ រាជរដ្ឋាភិបាល បានដាក់ចេញនូវយន្តការចំនួន៣ រួមមាន៖ ទី១) យន្តការដឹកនាំសម្របសម្រួល ទី២)យន្តការជំរុញការអនុវត្ត និង ទី៣)យន្តការតាមដាន ត្រួតពិនិត្យ និងវាយតម្លៃ ដែលក្នុងនោះយន្តការទី២ និងទី៣ គឺតម្រូវឱ្យគ្រប់ក្រសួង ស្ថាប័ន ត្រូវបុរេសកម្ម, សកម្ម និងមានកិច្ចសហការជិតស្និទ្ធជាមួយគ្រប់ភាគីពាក់ព័ន្ធ ក្នុងការរៀបចំផែនការសម្រាប់ធ្វើការគាំទ្រ និងជំរុញការអនុវត្តយុទ្ធសាស្រ្តបញ្ចកោណឱ្យសម្រេចបានជោគជ័យទាន់ពេលវេលា និងត្រូវការបូកសរុបវឌ្ឍនភាព និងការវាយតម្លៃជាប្រចាំ ឆមាស ប្រចាំឆ្នាំ ពាក់កណ្តាលអាណត្តិ និងចុងអាណត្តិ ជូនរាជរដ្ឋាភិបាល តាមរយៈទីស្តីការគណៈរដ្ឋមន្រ្តី។ វគ្គបណ្ដុះបណ្ដាលក៏មានការចូលរួមធ្វើបទបង្ហាញពីថ្នាក់ដឹកនាំ និងមន្រ្តីរាជការនៃនាយកដ្ឋានពិនិត្យ តាមដាន និងវាយតម្លៃ និងការដឹកនាំពិភាក្សាដោយ ឯកឧត្តមអគ្គនាយក ដើម្បីចែករំលែកនូវចំណេះដឹង និងបទពិសោធន៍ ជូនដល់សិក្ខាកាមដែលជាមន្រ្តីបង្គោល របស់ក្រសួងសាធារណការ និងដឹកជញ្ជូន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube