កិច្ចប្រជុំគណៈកម្មការសម្របសម្រួល(JCC) លើកទី៤ នៃគម្រោងពង្រឹងសមត្ថភាពរដ្ឋបាលកំពង់ផែ ក្នុងព្រះរាជាណាចក្រកម្ពុជា ទីស្ដីការក្រសួង៖ នាថ្ងៃអង្គារ ទី១២ ខែវិច្ឆិកា ឆ្នាំ២០២៣ ឯកឧត្តម អៀង វ៉េងស៊ុន រដ្ឋលេខាធិការ ក្រសួងសាធារណការ និង ដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការសម្របសម្រួល(The 4th Joint Coordination Committee-JCC) លើកទី៤ ជាមួយនឹងក្រុមការងារដើម្បីអនុវត្តគម្រោងពង្រឹងសមត្ថភាពរដ្ឋបាលកំពង់ផែ នៅព្រះរាជាណាចក្រកម្ពុជា ដោយមានការអញ្ជើញចូលរួមពីឯកឧត្តម អនុរដ្ឋលេខាធិការ មន្ត្រីពាក់ព័ន្ធ ដែលជាសមាជិកគណៈកម្មការសម្របសម្រួលអនុវត្តគម្រោង និងក្រុមជំនាញការជប៉ុនផងដែរ។ កិច្ចប្រជុំនេះរៀបចំឡើងដើម្បីពិនិត្យលើវឌ្ឍនភាពនៃការអនុវត្តគម្រោងពង្រឹងសមត្ថភាពរដ្ឋបាលកំពង់ផែ ក្នុងព្រះរាជាណាចក្រកម្ពុជា ដែលជាផ្នែកមួយនៃគម្រោង "គោលការណ៍ណែនាំសម្រាប់ផែនការអភិវឌ្ឍន៍កំពង់ផែ" និង "ស្តង់ដារបច្ចេកទេសកំពង់ផែនៅកម្ពុជា" ដោយបានបន្តផ្លាស់ប្តូរមតិយោបល់លើដំណើរការអនុវត្តគម្រោង ពេលវេលា និងការងារដែលបានកំណត់ សំដៅធ្វើយ៉ាងណាឱ្យគម្រោងនេះដំណើរការទៅឆាប់រហ័ស មានភាពសុក្រឹត និងអាចអនុវត្តបានដោយប្រសិទ្ធភាព ស្របទៅតាមច្បាប់ស្តីពី ការដឹកជញ្ជូនតាមផ្លូវទឹក នៅព្រះរាជាណាចក្រកម្ពុជា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube