(តាកែវ)៖ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយលោករដ្ឋលេខាធិការ អនុរដ្ឋលេខាធិការ អគ្គនាយកបច្ចេកទេស និងមន្រ្តីបច្ចេកទេស នៃក្រសួងអភិវឌ្ឍន៍ជនបទ ព្រមទាំងមានការចូលរួមពីលោក វ៉ី សំណាង អភិបាលខេត្តតាកែវ និងក្រុមការងារ នៅថ្ងៃទី០៩ ខែតុលា ឆ្នាំ២០២៤នេះ បានអញ្ជើញទៅពិនិត្យស្ថាបនា ផ្លូវចំនួន ៣ខ្សែ និងស្ពាននៅខេត្តតាកែវ។ ខ្សែទី១៖ (ផ្សារល្វេទៅស្រុកបូរីជលសារ) មានប្រវែងសរុប ១០.២គីឡូម៉ែត្រ ស្ថិតនៅឃុំបូរីជលសារ ស្រុកបូរីជលសារ។ នៅលើខ្សែផ្លូវនេះ មានសំណង់ស្ពានបេតុងចំនួន ៤កន្លែង រងផលប៉ះពាល់ដោយសារជំនន់ទឹកភ្លៀង។ ក្នុងចំណោមស្ពានទាំង៤នេះ មានស្ពានចំនួន ២កន្លែងបានរងផលប៉ះពាល់ដោយទឹកហូរច្រោះបណ្ដាលឱ្យស្រុតក្បាលស្ពាន និងស្ពានមួយកន្លែងមានឈ្មោះថាស្ពាន (ស្ពានប្រឡាយ៩៩) រងការខូចខាត ដាច់តួផ្លវមិនអាចធ្វើចរាចរណ៍បាន។ ចំពោះស្ពានដែលរងការខូចខាតនេះ លោករដ្ឋមន្ត្រី បានផ្តល់អនុសាសន៍ឱ្យប្រធានមន្ទីរអភិវឌ្ឍន៍ជនបទខេត្តតាកែវ ធ្វើការជួសជុលតភ្ជាប់ឡើងវិញ ជូនប្រជាពលរដ្ឋធ្វើចរាចរណ៍ ជាបណ្តោះអាសន្ន។ រីឯការជួសជុលឱ្យមានភាពរឹងមាំ តាមបច្ចេកទេសនឹងត្រូវអនុវត្តបន្ទាប់ពីទឹកស្រក។ ខ្សែទី២៖ (ធ្លាប្រជុំ-ភូមិរូង) ប្រភេទផ្លូវក្រាលកៅស៊ូពីរជាន់ (DBST) មានប្រវែង ៧,៨៨គីឡូម៉ែត្រ មានសំណង់លូមូលចំនួន ៧កន្លែង ស្លាកឈ្មោះផ្លូវចំនួន ២កន្លែង ស្ថិតនៅឃុំដូងខ្ពស់ ទៅភូមិរូង ភូមិអណ្តូងសំរិទ្ធ ឃុំធ្លាប្រជុំ ស្រុកកោះអណ្តែត ខេត្តតាកែវ។ ខ្សែទី៣៖ តភ្ជាប់ពីភូមិព្រៃសណ្តែក ឃុំព្រៃស្លឹក ទៅភូមិក្រាំងដៃ ភូមិក្រាំងធ្នង់ ឃុំធ្លក ភូមិត្នោតជុំ ឃុំសំបួរ ស្រុកទ្រាំង មានប្រវែង ៨,៧៣ គីឡូម៉ែត្រ ទទឹង ៨ម៉ែត្រ ក្នុងនោះមានជាប្រភេទ ផ្លូវបេតុងមានប្រវែង ០,២៥គីឡូម៉ែត្រ មានសំណង់ស្ពានបេតុងចំនួន ២កន្លែង លូប្រអប់ចំនួន ២កន្លែង លូមូលចំនួន ៨កន្លែង លូអ៊ុយរំដោះទឹកមានប្រវែង ៥០០ម៉ែត្រ។  ការដ្ឋានខ្សែផ្លូវនេះ នឹងត្រូវស្ថាបនាឱ្យចប់រួចរាល់នៅក្នុងខែធ្នូ ឆ្នាំ២០២៤នេះ៕