វគ្គផ្សព្វផ្សាយ អំពីអនុសញ្ញាស្តីពីការលុបបំបាត់រាល់ទម្រង់រើសអើង និងអំពើហិង្សាលើស្រ្តី កំពង់ឆ្នាំង ៖ ថ្ងៃទី ១៧ ខែកញ្ញា ឆ្នាំ ២០២៤ លោកជំទាវ មឹន មាណវី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងលោក ឈិន សេងងួន អភិបាលរងខេត្តកំពង់ឆ្នាំង បានអញ្ជើញជាអធិបតីភាពក្នុង វគ្គផ្សព្វផ្សាយ អំពីអនុសញ្ញាស្តីពីការលុបបំបាត់រាល់ទម្រង់រើសអើង និងអំពើហិង្សាលើស្រ្តី។ កម្មវិធីនេះមានការអញ្ជើញចូលរួមពី លោកស្រី ហ៊ូ សុផល្លិកា ខាងក្រុមប្រឹក្សាជាតិកម្ពុជា ដើម្បីស្ត្រី ជាអ្នកធ្វើបទបង្ហាញ លោកជំទាវអនុរដ្ឋលេខាធិការ លោកប្រធាន និងលោក-លោកស្រីអនុប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង កំពង់ស្ពឺ ពោធិ៍សាត់ បាត់ដំបង ព្រៃវែង កណ្តាល រាជធានីភ្នំពេញ ព្រមទាំងមន្ត្រីរាជការ ក្រោមឱវាទក្រសួង មន្ទីរ មានចំនួនសរុបប្រមាណជាង ១០០ នាក់។ គោលបំណងនៃវគ្គផ្សព្វផ្សាយនេះធ្វើឡើងក្នុងន័យបញ្ជ្រាបគោលគំនិត និងទស្សនៈយេនឌ័រ ចែករំលែកអនុសាសន៍១២ចំណុចរបស់សម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីបង្ហាញឱ្យឃើញពីការខិតខំរបស់រាជរដ្ឋាភិបាលកម្ពុជា ដែលបានផ្សារភ្ជាប់ជាមួយនឹងអង្គការអន្តរជាតិ ធ្វើកិច្ចសហប្រតិបត្តិការគាំទ្រគ្នាទៅវិញទៅមក រវាងប្រទេសកម្ពុជា និងប្រទេសនានាក្នុងសកលលោក សម្រាប់ជួយលើកកម្ពស់សិទ្ធិស្រ្តី ឱ្យមានសុខដុមភាព និងការអភិវឌ្ឍក្នុងសង្គមកម្ពុជាប្រកបដោយចីរភាព៕